ANG internet usa ka gasa gikan sa Ginuo ug kinahanglang gamiton sa insaktong pamaagi ug dili abusohan, matod ni Pope Francis niadtong Biyernes sa iyang mensahe nga nagtimaan sa World Communications Day sa Simbahang Romano Katoliko.
Unang higayon nga ang lider sa naila nga konserbatibo ug dakong simbahan sa kalibotan niluwat og pamahayag bahin sa internet, ang teknolohiya nahimong taytayan sa daghang kontrobersya, nagsiak sa utlanan sa kanasoran ngadto sa borderless society ug nipagamay sa kalibotan.
Ang Papa niila sa kapaspas sa social networks nga dako og impluwensya ug epekto sa atong pagpamalandong ug paghukom sa bag-ong henerasyon.
“The internet, in particular, offers immense possibilities for encounter and solidarity. This is something truly good, a gift from God,” matod ni Pope Francis.
Dugang sa Papa nga makatabang kini sa panagsuod, kahiusahan sa katawhan ug makapadasig sa lig-on ug seryusong lakang sa pagseguro alang sa mas tinahod nga pagpakabuhi sa tanan.
“The walls which divide us can be broken down only if we are prepared to listen and learn from one another...” dason niya, ang internet puwedeng magamit sa pagpalambo sa maayong komunikasyon.
Samtang, ang Santo Papa niila usab sa pagtumaw sa pipila ka problema sama sa kapaspas sa pagpasa sa kasayoran sa internet nga subra sa gikusgon sa “atong kapasidad sa pagpamalandong ug pagpakanaog sa dili balanseng hukom.”
Ang Papa nihagit sa paggamit sa internet sa matarong ug pagpakaylap sa ebanghilyo sa Ginuo.