NIGAHIN og P80 milyones ang Cebu Port Authority (CPA) alang sa pagbutang og boya sa Mactan Channel gikan sa mga pantalan sa Sugbo hangtod sa Lawis Ledge, diin sagad mangasangad ang mga barko.
Mao kini ang gipahibawo ni CPA General Manager Edmund Tan human si Maritime Industry Authority (Marina) 7 Director Nanette Villamor Dinopol namahayag nga human nasangad ang Weesam 7, panahon na nga magbutang ang CPA og mga navigational buoy nga maggiya sa mga incoming ug outgoing vessel.
Gawas sa Weesam, laing tulo ka mga barko, ang mv Joyful Star sa Roble Shipping, mv Subic Bay 1 sa Carlos A. Gothong Lines ug mv Our Lady of All Nations sa Medallion Shipping ang nangasangad usab bag-uhay lang.
Si Tan, usa ka retired commodore sa Philippine Coast Guard (PCG), nibutyag nga gipahibawo siya nga dili paigo ang P80 milyones tungod kay magkinahanglan sila og labing minos 53 ka mga boya, apil na ang bayad sa pagbutang niini sa dagat.
Hinuon, ang dugang pundo nga kinahanglanon aron mahuman ang proyekto, matod niya, ang iapil sa 2015 annual budget.
Si Deputy General Manager Yusoph Uckung namahayag ang pagbutang og boya alang sa pagpalambo sa luwas nga paglawig sa naasoy nga dapit ang kabahin sa plano sa CPA subay sa kamandoan ni Department of Transportation and Communication (DOTC) Secretary Joseph Emilio Aguinaldo Abaya Jr., sa pakigtambayayong sa PCG.
"This will be done after the dredging of Mactan Channel so the buoys can be properly positioned," sumala pa ni Uckung.
Matod ni Tan ang pagkasangad sa Weesam 7 niadtong Enero 23 dili tungod sa kakuwang og boya kon dili hayan human error.
Si Dinopol nakadawat og mga report nga inay moagi sa Consolacion, ang Weesam 7 didto miagi sa Cordova sa wala pa mapadpad sa mabaw nga bahin sa Lawis Ledge.
"Nonetheless, the project (navigational buoys) is on the pipeline for implementation this year," dugang ni Uckung. Sun.Star Cebu