PULIS nagsukmagay sulod sa Station 3 sa Mandaue City Police Office (MCPO) tungod sa giingong panag-ilog kon si kinsa ang moinbestigar sa ilang dinakpang hubog nga nagdalag armas.
Walay bisan usa ka pulis ang miangkon nga sila ang nanguna sa pagpanukmag human nahitabo ang kagubot sulod mismo sa ilang buhatan niadtong Sabado, pasado alas 11:00 sa gabii.
Usa ka Victorino Maneja ang gireklamo sa iyang live-in partner nga si Catherine Dimpas nga siya gikulata.
Ang suspek nga si Maneja nasikop ug nakuhaan kinig kalibre .38 ug adunay mga bala ug giigong hubog kini atol sa hitabo.
Sulod sa police station, si SPO1 Gregorio Cabizares, desk officer, nipahigayon og inbestigasyon sa dinakpan.
Apan ang suspek pakalit kining gikuha sa duha ka mga pulis nga sakop sa operatives nga sila si PO2 Salvador Pogoy ug PO1 Ronald Manlangit ug gisulod sa usa ka lawak aron usab imbestigahon.
Katarungan sa duha ka pulis nga wala pa gisugdan sa pag-inbestigar ang dinakpan hinungdan nga ila kining giuna sa pagpangutana sanglit sila nagtuo nga aduna mahuka niining kasayuran labot sa ginadiling drugas.