USA ka 5-anyos nga batang babaye ang patay human natusaktusak og bala sa pusil dihang girakrakan ang ilang balay sa bukirang Sitio Punod, Barangay Tagjaguimit, dakbayan sa Naga niadtong Dominggo, alas 10:00 sa gabii.
Si Jinjin Pasquira, 5, nakaangkon og samad sa nagkadaiyang parte sa lawas human ang duha ka wala mailhing tawo namusil ginamit ang kalibre .45 ug 9mm pistol.
Si P01 Danilo Fernandez, desk officer sa Naga Police, niingon nga ang bata natulog sa panimalay sa iyang apuhan nga si Prima Cantorne, 59, ug biyuda.
Matod pa, ang biktima lang ug ang apuhan ang naulog sa payag diin nahimutang sa awaaw nga lugar nga walay silingan.
Ang apuhan buntag na nitug-an sa mga barangay tanod sa lugar hinungdan nga alas 12:00 na kagahapon sa udto napahibalo ang krimen sa kapulisan sa Naga.
Ang apuhan nibutyag nga nangatulog na sila niadtong higayuna dihang nakabati siyag kasaba sa gawas sa panimalay, nabantayan niini nga dunay nitulod sa pultahan hinungdan nga gipugngan niini.
Dungan sa iyang pagpugon sa pultahan sa iyang panimalay, nabati sab niini ang sunodsunod nga buto sa armas hinungdan nga nakurat.
Human sa butobuto sa armas dali niyang gisusi ang iyang apo, apan patay na kini human natusaktusak sa mga bala.
Nagkurog sa kahadlok hinungdan nga gipaabot nalang niya ang kabuntagon una gipahibalo sa barangay tanod.
Sumala ni PO1 Fernandez, 10 ka kabhang sa bala sa kalibre .45, ang nakuha sa crime scene, 4 ka kabhang sa .9mm pistol og 2 ka slug.
Si Supt. Eduardo Saavedra, hepe sa Naga Police, nagkanayon nga nag-umol siya karon ug team nga motutok sa pagresulbar sa krimen.
Sumala pa niini nga ang apuhan wala akahatag og insaktong pamahayag kabahin sa krimen kay igo lang miingon nga wala silay kontra.
Ang kabahin sa yuta ug ubang panagbangi gilakip nila sa imbestigasyon kay nagtoo silang duna gyuy gikaaway wala lang mohatag og detale ang uang miyembro sa pamilya.
Lakip sa dili mokooperar ang mga kabanay nagdumili sa pag-abaga sa kapulisan kun unsay atraso sa ilahang pamilya nga gihimoan sa niloog nga krimen.
Si Saavedra nipasabot nga nagtuo siya nga dunay lawom nga rason kun nganong gipusil ang panimalay sa maong tiguwang ug naangin lang ang apo niini.
"Akong tan-aw target gyud ang tiguwang posibli kaayong bata, sutaon namo kining taho nga dugay na nga nawala ang apuhan og karon lamng mibalik sa lugar,” dugang ni Supt. Saavedra.
Sumala pa nga nakaangkon lang kinig gamay’ng garas sa kamot, hinungdan nga palawman nila ang imbestigasyon pagsuta kun wala bay foul play ang kamatayon sa bata.