PATAY ang usa ka lalaki human giluba sa kainom mga alas 8:30 sa gabii, Miyerkules, Nobiyembre 13, sa Lambagohon, Hinaplanan, Claveria, Misamis Oriental.
Giila ang biktima nga mao si Junbert Ramos alyas Polong, 28, ulitawo, residente sa dapit.
Gitumbok nga suspek mao si Luis Carangcarang.
Sa inisyal nga imbestigasyon sa Claveria Police Station sa pagpangulo ni Police Major Raymund Lumapay naabtan ang biktima nga naligo na sa iyang dugo.
Naghay-ad kini sa gawas sa panimalay sa suspetsado nga adunay samad dinunggaban sa lawas ug nga gitouhang maoy hinungdan sa kamatayon.
Giingong nag-inom pa kining duha ug dihang lango na sa ilimnong makahubog nagkalalis ug nagkabikil nga misangpot sa pagpangluba.
Usa ka hot pursuit operation ang gilusad karon sa kapulisan human ang suspek daling misibat.