KRITIKAL ang kahimtang sa 22-anyos nga lalaki human gitigbas ang ulo niini sa wala mailang kustomer kagahapon mga alas 2:00 sa kadlawon sa Capistrano Street, ning siyudad sa Cagayan de Oro.

Giila ang biktima nga mao si Gervancio Arlan, hingkod ang edad, residente sa Macanhan, Carmen ning siyudad.

Sa report sa Northern Mindanao Medical Center (NMMC) basi sa pamahayag sa kapuyo sa biktima nga mao si Gina nasuta nga miaparta lamang si Arlan sa iyang kaaway sa bar diin siya nagtrabaho.

Saysay ni Gina nga aduna siya kustomer nga naaway niadtong tungora dihang milaban kaniya si Arlan.

Grabe ang sukmaga nga nahitabo sa duha gawas sa naasoyng’ bara apan kay dehado man ang suspetsado milakaw. Apan nakurat sila dihang mibalik kini og bitbit na ang sundang.

Walay sulti nga gitigbas sa suspek ang ulo ni Arlan. Nakaangkon ang biktima og labihan kadako nga samad sa ulo hinungdan nga talandugon ang kahimtang niini gani dili gyod makasulti hangtod sa pagsulat ning balita.

Ang suspek daling misibat human sa hitabo samtang ang kaso giimbestigahan na ning panahona sa kapolisan sa Police Station 1 (PS1) sa Divisoria.(SVB)