NILANDING sa balay tambalanan ang 22-anyos nga lalaki human gipusil samtang nagmaneho sa iyang motorsiklo niadtong Domingo sa gabii sa Barangay Lumbia ning siyudad sa Cagayan de Oro.
Giila ang biktima nga mao si Jay M. Ansin, hingkod ang edad, residente sa susamang dapit.
Sa inisyal nga imbestigasyon sa Police Station 8 (PS8) sa Lumbia ubos ni Police Senior Inspector Erickson Sabanal, nasuta nga ang biktima usa ka habal-habal driver sa maong dapit.
Samtang namasahero ang biktima ug anaa sa hilit nga bahin kalit lang kining gipusil sa wala mailhing nga suspetsado hinungdan sa pagkaigo sa hawak sa biktima.
Taliwala nga samdan kini padayon gihapon kini sa pagmaneho sa iyang motorsiklo ug wala mihunong taliwala sa mando sa suspetsado nga ipahunong ang biktima.
Nakapatabang pa ang biktima sa iyang mga kauban hinungdan nga dali kining gidala sa Northern Mindanao Medical Center (NMMC).
Ang biktima nakaangkon og samad sa iyang hawak nga padayon pa nga giobserbahan sa mga doktor ning panahona.
Giimbestigahan na usab sa kapolisan ang motibo sa pagpamusil labina usa sa anggulo nga ilang gitutukan mao ang pagpangarnap sa motorsiklo.
Kahinumdumang’ bag-o lang usa ka habal-habal driver ang nakabsan gyod sa iyang kinabuhi human gipusil ug gitangag pa ang motorsiklo niini diha sa Barangay Calaanan ning siyudad.
Ang kapolisan nanawagan sa mga habal-habal driver nga magbinantayon ug magmatikod sa ilang mga kostumer nga sagad magpatuong mga pasahero.