KIDAPAWAN CITY - Nakaangkon og mga bangag ang military truck human mibusikad ang improvised explosive device (IED) alas 5:00 sa hapon niadtong Dominggo didto sa probinsiya sa Cotabato.

Gibutyag ni 6th Infantry Division, Philippine Army spokesman Colonel Dickson Hermoso nga naghatud lang unta og tent ang KM 450 military truck sa Charlie Company sa 40th Infantry Battalion didto sa Tampat Patrol Base sa Barangay Olandang, Midsayap sa dihang mibusikad ang IED sa dalan.

Ang pagbusikad nahitabo kilid sa kalsada sa dihang pauli na ang mga sundalo sa ilang command post.

Gihulagway nga ang eksplosibo gama sa duha ka bala sa 60 mm mortar didto sa Barangay Nabalawag, Midsayap.

Suwerte nga nakalapas na og gamay ang trak sa militar hinungdan nga walay naangol ug napatay nga sundalo.

Nakaangkon og mga bangag ang military truck agi sa mga tipaka sa mibusikad nga IED.

Samtang mga sibilyan nga namuyo duol sa dapit mibati og kahadlok sa nahitabo.

Nagtuo ang militar nga posibling mga miyembro sa Bangsamoro Islamic Freedom Fighters (BIFF) ang nagbutang sa bomba sa kilid sa dalan nga gibutangan og 9 volts battery ug Nokia cellphone isip triggering mechanism.

Militar ug kapulisan padayon pang mihimo og dugang pagsusi sa hitabo aron nga di na masubli ang hitabo.