KALIT nga mihuboy ang nipis nga nawong sa actor/comedian nga si Vhong Navarro. Di tungod kay nagpaguwapo ginamit ang ilang gitawag og botox, kana bitawng paburot sa nawong aron mawagtang ang kunot ug makapabugdo sa aping.
Ang hinungdan kay gibun-og sa negosyanteng si Cedric Lee, si Navarro, sumala sa alegasyon ni Vhong. Maluoy ka magtan-aw sa dagway niya nga magkatawa kon imong hunahunaon ang iyang pagka komedyante.
Para nako, selos ang hinungdan ni Lee sa pagpakigtagbo ni Navarro ni Deniece Cornejo, 22, nga maanyag nga modelo nga niresulta sa pagpanapat. Selos kay giguba man gyud ang nawong ni Vhong.
Unsay inyong tan-aw mas guwapo si Vhong ikompara ni Cedric? Magdepende na kana sa magtan-aw. Gani dunay mga panghitabo tungod sa selos, ang nawong gyud ang giguba tungod sa pagyabo ug asido.
Sa ato pa, bulahan ang mga batig nawong kay wana kinahanglana ang pagguba sa bati nga dagway kay ngil-ad nang daan. Apan lupigon tang mga guwapo (hehehe) sa mga bati nga daghag kuwarta. Ug ang kuwarta makapa guapa sab ug maka guapo pinaagi sa pagretoke.
Mao nay giingon, salamat po doktor!
Balik sa isyu sa pagka bun-og sa aktor, nag-iyahay nag pasangil ang masig kahabig sa maong panghitabo. Matod pa sa akong amigong palakero, alkanse si Navarro kay di iyang teretoryo ang condo unit ni Deniece, ang nagpalit ang lalaki.
Sa ato pa, si Vhong maoy nanulong ug igo lang nidepensa sa ilang kaugalingon ang manag-uyab nga si Lee ug Cornejo. Kining duha wa moangkon nga manag-uyab kon di higala lang kuno. Mao nay giingon estoryaheee.
Karong panahuna, ang di seryuso nga relasyon bisag uyab na, tawgon lang og best friend. Bulgar ug bastos ra sab nang f--king friend kun FF. Kana nagpasabot nga ang babaye o lalake daghan ug gika relasyon.
Mao nga wa ko magmahay nga nahimong buotan kauban sa akong mga amigo nga gianggaan og Mang Bimbol, Mang Juvy, Mang Atan, Mang Tatay, Mang Val, Mang Dodong, Mang Rodyard, Mang John, Mang Idol ug Mang Cyrus. Kini sila kauban nako, mga badminton player, runner, basketbolista ug sikad bisiklita.
Kay kami dili kaliwat sa banggitang si Mang Kanor! E-search sa internet ug si kinsa si Mang Kanor aron magkailaila mo. Murag diha maliwat si Vhong ug si Cedric ni Mang Kanor. Gamay’ng ideya, banggiitan kanang tawhana sa mga babaye tungod sa iyang kuwarta.
Doble ang dimalas ni Vhong, bun-og pa ug gipasanginlan pa gyud nga misuway sa paglugos sa babaye. Paet ug sakit ! Kay nagpahibawo si Navarro nga mobisita sa condo sa babaye.
Unsa man gi set-up ug tayming lang sab nga didto si Lee?
Mipasangil sab si Vhong gisuwayan siyag pangayog P2 milyones. Unsa man areglo ba aron di idayon og blotter ang pagsuway sa paglugos? Ang nakaapan kay may gipermahan ang actor sa pasangil sa pagsuway ug lugos sa babaye. Apan giingon sa abogado ni Navarro pinugos ang pagpirma kay nahulga ang kinabuhi sa iyang kliyente.
Samtang ang lain nakong kailang negusyante, miingon mas maayo nga ang dunay uyab di nalang hilabtan aron malikayan ang kasamok. Matod pa niya, atol sa meeting kanang babaye nga naglingkod sa gawas, ako nang uyab. Hinumdomi, basta dako nag gasto, duna gyuy mahitabo.
Di ba, mao ni moral lesson sa nahitabo ni Vhong? Ang problema dunay daghang babaye ang di moangkon. Ang resulta magkagubot sa panahon mabulilyaso. Mao kanay resulta sa kahakog, di makontento ug usa ug ang dili pagka matinud-anon.
efren_lonzon@yahoo.com, Sun 09327380888, Globe 09156938444