“BONG” ug “Vhong” nangaigo karon sa mga kontrobersiya. Sila si Senador Bong Re­villa ug Vhong Navarro nga artista sa pelikula ug host sa usa ka programa sa telebisyon.

Gawas sa pork barrel, si Bong naproblema usab sa iyang kaminyuon human lagi sa giingong duna pay laing binuhat nga nakapapitik sa iyang kasingkasing. Hinuon, matawag nato ug personal nang botanga apan kay siya taga showbiz ug opisyal sa gobyerno, dili kapugngan ang mga tawo nga mosumsom niya ug istorya.

Sa habig ni Vhong, babaye gihapon ang hinungdan nga siya nabun-og. Ang dili malalis mao nga si Vhong nabun-og. Lalisunon pa ang motibo ug si kinsa ang nagkulata kaniya.

Sa pamahayag ni Vhong, niadtong Enero 22, siya mibisita sa gipuy-an sa iyang amiga sa usa ka condominium unit sa Taguig City. Dunay grupo sa kalalaken-an ang mitaptap sa iyang mga mata ug mitabang niya ug kulata.

Ang 22 anyos nga babaye nga nailhan nga si Deniece Millet Cornejo, miakusar nga gisuwayan siya ug lugos ni Vhong. Samtang si Vhong midepensa sa pag-ingon nga siya gi-blackmail sa mga mikulata kaniya nga gipanguluhan sa usa ka negosyante nga iyang ginganlan ug Cedric Lee.

Matod ni Vhong nga siya gipangayuan ug P1 milyones nga kuwarta isip danyos sa pasangil sa pagsuway niya ug lugos sa iyang amiga. Gipugos usab siya ug pa-record sa video nga nagkanayon : “Ako si Vhong Navarro, ni-rape ko ang kaibigan ko.”

Dili pa nato mahibaw-an ang mas lawom nga hinungdan sa gidangatan ni Vhong.

Mahimong nagtug-an siya sa tinuod o namakak. Mahimong ang babaye nga miakusar niya ug lugos nagtug-an sa tinuod o kutob ra sa pamasangil.

Trabaho kini sa mga polis didto sa Taguig nga tarungon ang pag-imbestigar. Sa dihang gidala si Vhong sa mga miakusar kaniya sa presinto sa Taguig human sa hitabo, nganong wala man makahimo dayon ug aksyon ang kapolisan?

Kon dunay katahap ang mga polis nga misuway sa pagpanglugos si Vhong, nganong wala man siya isulod dayon sa detencion cell pinasikad sa gitawag ug citizen’s arrest kon tinuod nga naaktuhan nga nakahimo siya ug krimen?

Sa pagkakita sa mga pulis nga bun-og ang nawong ni Vhong, nganong wala man siya gidala dayon sa ospital aron dunay kurasyon sa doktor ?

Medyo migawas na sab ang pagkatanga sa mga polis sa Taguig. Kon ingon ana sila katanga nga motagad ug kaso diin tunog sa showbiz ang partido, unsa na kaha ang mga ordinaryo lang ug mga timawa nga tawo?

Ang nahitabo kang Vhong, ang kabahin lang sa daghang mga inhustisya nga nahitabo

gumikan sa pag-pinulpol sa ubang mga polis sa ilang trabaho.

Unta palawman pa sa kapolisan ang imbestigasyon sa naila nga Mr. Suave ug Lastikman. Dili maayo nga mosayaw lang sila niining kasoha ug Totoy Bibo.