TAGUM CITY - Pulos mitugpa sa balay tambalanan ang mag-inahan human gipangdunggab sa mitulis kanila nga mga lalaki didto sa Purok 2, New Balanban ning siyudad niadtong milabay nga adlaw.

Sumala sa taho gikan sa Tagum City Police Office, gipangdala ngadto sa Bishop Reagan Hospital ang mga biktima nga nailhan sa pangalang Dharen Joy Mapa, 25, tag-iya og tindahan, ug iyang anak nga si Drik Gudin, 3.

Migawas sa inisyal nga imbestigasyon nga alas 10:50 sa gabii gisaka sa mga suspek ang balay sa mga biktima kon diin nangatulog niadtong higayona.

Kalit nga gipangluba ang mga biktima sa makadaghang higayon.

Nasuta nga sa ulo nakaangkon og daghang mga samad ang mag-inahan hinungdan nga dali silang gidala ngadto sa ospital.

Niadtong tungura, matud pa, gisikwat sa mga suspek ang P1,300 nga kuwarta sa mga biktima.

Gisulti ni Police Chief Inspector Alvin Saguban, deputy police officer sa TCPS, malampusong nadakpan na nila ang duha ka mga suspek nga nailhan sa pangalang Jabor Casok ug Lauro Sumagaysay.

Nasikop ang duruha didto na sa lungsod sa Nabunturan subay sa pagpakig-koordinar sa mga kasundalohan.

Kagahapon, nasayran nga gihikay na sa mga pulis ang kaso batok sa mga suspek nga ning tungura padayong gibalhog sa selda sa TCPS.