NABIYAAN og 18 puntos sa tungatungang bahin sa opening quarter, si Kevin Durant u gang Oklahoma City Thunder nakakita og igong agianan aron masaksihan ang yanong kadaugan.

Kini maoy saktong senaryo nga ilang gikahimuot og maayo.

Si Durant pabiling mainiton ug mipabuto kini og 33 puntos, midugang og 22 si Serge Ibaka u gang Thunder daling mipawong sa kainit sa defending champion Miami Heat, 112-95.

Ang Thunder nakaposte og 25 puntos nga labaw ug nakapasulod og 16 sa 27 ka itsa sa three-point area samtang ang Miami igo lang naka-convert of tulo sa 19 ka attempt niini sa 3-pt. arc.

Sa iyang nahimo kagahapon, si Durant nakakulit og 30 puntos matag duwa sulod sa 12 ka sunodsunod nga higayon nga moay pinakataas nga nahimo sa usa ka player sukad ni Tracy McGrady niadtong 2002-03 season nga may 14 ka way putolputol higayon.

Si LeBron James adunay 34 puntos, Chris Bosh nakapugnit og 18 puntos samtang si Dwyane Wade mitali og 15 sa maong kapildihan sa Heat.

Ang beternaong si Derek Fisher sa Thunder perpekto sa iyang lima ka itsa sa three point area alang sa iyang 15 puntos.

Kon ka­­hinumdo­man, si Fi­sher nakahimo usab og lima ka three-point shots sa dihang nagsangka ang Heat ug Thunder niadtong 2012 NBA Finals.

Sa laing duwa, gibaraw sa Toronto Raptors ang magic sa Orlando, 98-83; gipatapsingan sa Philadelphia ang Boston, 95-94; samtang giukoban usab sa Minnesota Timberwolves ang New Orleans Pelicans, 88-77.

Gipagtong usab sa Phoenix Suns ang Milwaukee Bucks, 126-117, gilupig usab sa Houston ang Dallas, 117-115.

Gisungay sa Chicago Bulls ang San Antonio Spurs, 96-86, samtang gitangtangan sa trono sa Memphis Grizzlies ang Sacramento Kings, 99-89.

Ang LA Clippers mipiit usab sa Washing Wizards, 110-103.