GIBUTYAG ni Davao City Mayor Rodrigo Duterte nga ang giduso nga ordinansa labot videoke ug vehicle sound systems kinahanglan magbantay ang publiko sa katungod sa ubang tawo.

Si Duterte misuporta sa maong ordinansa nga gipangamahanan ni Councilor Karlo Bello, nga giaprubahan sa first reading ug gitakda alang sa mga committee hearings.

"Ang katuyoan gyud ana is respeto sa isig katawo nimo. Your right to enjoy music is also subject to the rights of others, imong silingan nga gusto'g hilom. You cannot do it nga mag buntag na lang," suma niya sa mga tigbalita didto sa Bankerohan.

Ang ordinansa nagdili sa paggamit og component o sound system, motorcycle stereo, videoke machines, ug karaoke machines gikan alas 9 sa gabii hangtud alas 6 sa buntag apan mamahimong mogamit niini sa espesyal nga okasyon.

Ang mayor nagkanayon nga nagsuwat na siya og Executive Order (EO), nagmando sa samang probisyon sa giduso nga ordinansa.

Ang EO, hinuon, wa pa miguwa.

"They're making it official. It would include private houses," suma niya.

Si Duterte nagkanayon nga ang pag-ban sa videoke kinahanglan nga magsugod sa alas 9 sa gabii, sanglit ang ubang tawo natulog na nianang orasa.

Ang ordinansa nag-ban usab sa bora-bora nga tambutso, gikapusog nga car stereo nga makabungog sud sa residential areas.

Si Duterte nagkanayon nga bisan wala ang ordinansa, ang publiko kinahanglan nga pahimangnoan nga ang paggamit niini usa ka kalapasan.

"Noise pollution na eh," suma niya.

Giingon sa mayor nga buot nga imbestigahan ug hisgutan sa konseho ang ordinansa pinaagi sa committee hearings.

Ang ordinansa nagsulti nga ang paggamit sa sound-producing equipment atol sa espesyal nga okasyon magsugot sa alas 6 sa buntag hangtud alas 2 sa kaadlawon o subay sa gitugot sa mayor.

Giingon sab nga mangayo og pagtugot sa barangay council ug sa mga silingan kon mogamit og sound system atol sa selebrasyon.

Laing gidili sa ordinansa mao ang: pagbutang og videoke bars, karaoke bars sud sa residential areas; paggamit og welding machines, repair shops sud sa residential areas sa di pa ang alas 8 sa buntag ug human sa alas 5 sa hapon; pagpadayon sa trabaho sa konstruksyon sa gambalay, imprastraktura sud sa residential area gawas kon gitugotan sa mga nagpuyo sa palibot; ug paggamit og bora-bora, kusog nga car stereo sud sa residential areas.

Ang multa mao ang: P200 alang sa unang opensa, P1,500 alang sa ikaduha, ug P2,000, pagsira sa establisemento, ug pagkapriso og 30 ka adlaw alang sa ikatulo ug sa mosunod nga opensa.