PARANG, Maguindanao -- Patay ang usa ka mananagat human siya nabuthan og dinamita alas 2:00 sa hapon niadtong Huwebes.
Ang biktima mao si Sawili Lage, 37, minyo ug molupyo sa Barangay Gutongan, Parang, Maguindanao.
Nasayran gikan sa spot report sa Maguindanao Provincial Police Office nga samtang nanagat ang biktima sa Illana Bay sa Parang, gisindihan niya ang usa ka dinamita aron i-itsa sa dagat, apan napalong ang kalayo niini hinungdan nga gisindihan pag-usab.
Giingon nga wala nabantayan sa biktima nga mikatay na diay ang kalayo sa unang pagsindi niini sa dinamita mao nga mibuto.
Patay gilayon si Lage dihang nakaangkon kini og daghang samad sa nagkadaiyang parte sa iyang lawas igo sa mga tipaka sa eksplosibo.
Dunay ubang mga mananagat nga nakakita sa hitabo nga maoy midala sa patay nga lawas sa biktima sa ilang pinuy-anan.
Sa kasamtangan, ang kapulisan padayon nga nag-imbestiga labot sa kamatayon sa biktima aron masuta kon asa kini namalit og dinamita ug kinsa sab ang namaligya sa eksplosibo. (Edgar Fuerzas)