DIGOS CITY -- Misibog ang dakong kompaniya sa Swiss mining giant Glencore Xstrata sa ilang $5.9-billion gold-copper mining nga proyekto sa Pilipinas.

Kini maoy gipahibawo sa ilang Australian partner nga Indophil nga ang maong kompaniya di na modayon sa Tampakan project didto sa South Cotabato.

Ang Melbourne-based Indophil Resources NL nagkanayon sa ilang quarterly report nga gipaguwa karong semanaha nga ang "Glencore Xstrata mi-abiso sa Indophil ug anaa niini ang hukom sa pagdayon sa planong pagmina sa Tampakan."

Ang pagmina sa lugar, apil nga maka-benepisyo ang lungsod sa Kiblawan, Davao del Sur.

"All indications point to Glencore Xstrata seeking to divest its majority interest in the Tampakan Copper-Gold Project," sumala sa taho.

Abril 2013 pa gitun-an sa maong kompaniya ang Tampakan project ug gikonsidera ang taas nga proseso niini.

Niadtong Septyembre 2013, ang Glencore Xstrata mipahibawo nga wa na sila maglantaw sa "greenfield" ug mobalhin na lamang sa mga nasugdang pagmina.

Ang Indophil report nagbutyag nga usa sa mga nakit-ang suliran sa kompaniya mao ang open-pit mining nga nakalangay sa proyekto ug hangtud karon nagpabilin nga ordinansa sa South Cotabato.

Ang minahan mao unta ang pinakadakong proyekto nga ibubo dinhi sa nasud Pilipinas apan tungod sa mga pagbabag sa mga relihiyusong sektor, komunidad ug mga progresibong pundok ug daghang rekisitos nga kinahanglan hinungdan nga naglisud sila nga masugdan kini.

Niadtong Agosto 2013, gipangtaktak sa Glencore Xstrata ang daghang trabahante sa Tampakan project tungod sa way klarong proyekto.

Padayong gibarogan sa probinsiya sa SoCot ang ilang ordinansa sa pag-ban sa open-pit mining, hinungdan nga di masugdan ang pag-develop sa Tampakan mines, diin anaa naka-deposito ang pinakadakong bulawan sa Asya.

Apan wa giklaro sa pahayag sa Indophil kon unsay mahitabo kon ugaling mahinayon ang pull-out sa Glencore Xstrata.

Sa kasamtangan, ang Indophil maoy naggunit sa plano ug kaalyado niini ang Glencore Xstrata nga nangita og mga pamaagi alang sa proyekto.

"We will work with Glencore Xstrata to assist in meeting objectives for the project," panapos sa taho. (Orlando B. Dinoy)