DUNAY mga nagtinguha karon nga ma legalize na ang marijuana dinhi sa nasod. Kini human gikataho nga mahimo usab diay kini nga tambal batok sa pipila ka mga sakit.
Si Isabela Rep. Rodolfo Albano III, sakop sa house minority bloc, mipasaka og balaodnon nga makapahimo na unyang legal sa marijuana kon maaprobahan sa mayoriya sa atong mga magbabalaod.
Ingon niya nga ang pagdiskobre nga kini adunay mga chemicals nga makaayo og sakit sa tawo maoy nakapaaghat kaniya sa pag-umol og balaodnon sa kongreso.
Kon ang kaayohan o tambal nga gikan sa marijuana lang ang hisgutan maayo kining lakang ni Albano, pero angay unta usab niyang tun-an og maayo kon unsay mga kadautan o epekto nga matagamtam niadtong mga tawo nga mogamit og marijuana.
Ang pagtuon nagkanayon nga ang marijuana adunay kapin sa 400 ka mga chemicals ug lakip niini mao kanang gitawag og delta-9-tetrahydrocannabinol o THC nga maoy aktibo kaayong motay-og sa utok.
Aduna usab kini epekto ngadto sa kasingkasing ug ingon man dali ra usab kining makapabalisa o makapabalaka sa tawo. Duna usab kini siyay chemicals nga maka-cancer sama sa sigarilyo.
Ang pagsigarilyo sa marijuana maoy sayon nga paagi nga makasulod dayon ang THC ug ubang mga chemicals ngadto sa agianan sa dugo.
Ang aso sa marijuana kon mahingus sud, sa pipila lang ka segundos, moderitso ang THC sa baga.
Kini maoy pipila lang ka mga kadautan nga atong nalakbitan kalabot sa paggamit og marijuana. Ug kon si Albano mihimo pa lang unta og halawom nga pagtuon, labing siguro, di siya maaghat pag-umol niining gitawag og “killer bill.”