Estrella Dolores
Cebu City
PAG-ABOT ni Baldo gikan sa trabaho gisugat siya sa kamingaw sa ilang balay. Wa na si Celia ug Harold. Sa gamayng lamesita may nakita siyang note ni Celia. Iyang gipunit ug gibasa.
“Balds, adto sa ko mo-estar sa ilang Papa, gida nako si Harold. Anha lang unya kaon sa inyong canteen. Ambot, uy, saputon man ko magtan-aw sa imong nawong. Mopauli lang unya ko.”
Mipahiyom si Baldo nga naghunahuna sa kinaiya sa iyang asawa kon mangaa, maglagot magtan-aw niya. Mao sad ning gibati ni Celia dihang nagsabak ni Harold. Matag karon ug unya adto mopuyo sa iyang ginikanan kay maghang kuno iyang gibati nga magtan-aw niya. Usahay, pataka lag pangabubho.
Milabay ang pipila ka mga adlaw. Valentine’s Day na ug wa pa gyud mopauli sa ilaha si Celia. Miduol kaniya si Engr. Mateo Tikig nga iyang sinaligan sa planta nga mapahiyumon.
“Sir, kahibawo ko nga wa pa mopauli ang imong asawa, mag-inom ta sa Ocean Park sa Naga karong gabii, Valentine’s baya.”
“Sige ba.” Iyang tubag sa iyang sakop kansang nars nga asawa bag-o pang mi-abroad. “Maayo didto kay hayahay ug daghang sea foods,” puno ni Baldo.
Daghan na ang mga tawo sa Ocean Park sa ilang pag-abot ni Engr. Tikig. Midiretso sila sa kan-anan sa mga seafoods. Human sa makabusdik nga panihapon mi-order si Engr. Tikig og duha ka grande. “Tagsa ta, Sir.” Gihatod sa waiter ang beer sa ilang lamesa.
Namatikdan niya nga saba na kaayo ang nanag-inom sa duol nga mga lamesa. Sa unahan daghan ang nanuroy sa park mga manag-uyab nga nag-agbayay. Dihay daghang nanglingkod sa seawall. Misanag pag-ayo ang park.
Hapit na mahurot ni Baldo ang usa ka grande dihang mi-order na sad si Engr. Tikig. “Kana na lang, Mat, kay morag di na mada,” pasidaan ni Baldo.
Taudtaod, may duha ka mga seksing babaye nga gisenyasan ni Engr. Tikig. Miduol kanila.
“Lingkod mo, unsay inyong gusto? Sir, akong mga amiga.”
Sa hanap nga panan-aw ni Baldo nakita niyang mga batan-on pa kini.
“Softdrinks lang amo, Engr, kay busog na mi,” tubag sa usa nga puwa kaayog ngabil.
May gihunghong kang Baldo si Engr. Tikig. Mipahiyom si Baldo ug mitangdo.
Pagkahuman nilag inom ni Baldo, misirit ang sakyanan ni Engr. Tikig sakay ang duha ka mga babaye. Milahos sila sa usa ka gamayng balay. Sa sulod sa kuwarto mihigda dayon si Baldo.
“Sige, Day, masahii una ko sa di pa ang kombati. Ayuha.” mando ni Baldo sa babaye nga daw bugnaw ang mga kamot. Ug nangluspad. Sa pikas kuwarto nadungog niya nga may nanaghangos. Ah, miarangkada na si Engr. Tikig, iyang hunahuna. Sa kaanindot sa masahe, inanayng namug-at ang iyang mga mata.
Nakamata siya sa pagpukaw ni Engr. Tikig. Buntag na.
“Sir, guwapa to ang imong Valentina, si Mennen ug karon pa kuno to kasuway, kay way ikabayad og tuition sa eskuylahan kay wa pa moabot ang kuwarta gikan sa ginikanan. Virgin, Sir? “
Wa siya motubag, igo lang siyang mipahiyom. Hapit siya makasala kang Celia ug sa batan-ong tinun-an. (Katapusan)
