MIDUWA na kagahapon si Jason Collins, ang labing unang mahuyang nga aktibo pa sa National Basketball Association ug uban pang mayorihiyang professional sports sa Amerika.
Nipakita dayon og aksyon si Collins, upat lang ka mga oras human siya nakapirma og 10 ka mga adlaw nga kontrata sa Brooklyn Nets ug giklaro niya sa interbyu sa mga reporter nga nakatutok lang ang iyang atensyon sa iyang mahimo sa umaabot ug dili sa miagi.
“I don’t have time to really think about history right now,” pasabot ni Collins.
Miangkon ang 35 anyos nga mahuyang sa iyang pagkatawo pagkahuman sa miaging season apan usa siya ka free agent niadtong higayuna.
Human sa iyang pag-angkon, ubay-ubay nga mga magduduwa sa NBA nga dawaton gihapon nila sulod sa locker room si Collins.
Kalit siyang nahimong ambassador alang sa mga katungod sa mga mahuyang ug nahimo siyang speaker sa United Nations ug mitunga siya sa tinuig nga State of the Union address ni US President Barack Obama isip usa ka pinasidunggang dinapit ni first lady Michelle Obama.
Sa labing una niyang duwa sukad sa iyang pag-angkon sa iyang pagkatawo, wala nakapuntos si Collins sulod sa 10 ka mga minutos sa kadaugan sa Nets batok sa Los Angeles Lakers, 108-102, kagahapon.
“The pressure is playing in an NBA game tonight, and last time I played in an NBA game was last April,” pasabot ni Collins. “So I think that’s enough pressure right there.”
Gihangop sa mga tawo si Collins atol sa duwa gumikan sa gipagawas nga kaisog niini.
“I know that I can play in the NBA, and it felt good to be out there tonight,” dugang ni Collins.
Sulod sab sa 12 ka seasons nga nagduwa si Collins sa NBA sa wala pa siya miangkon sa iyang pagkatawo. (AP)