HELLO kaninyo! Kumusta po? Me? Maayo kaayo pinaagi sa grasya sa Ginoo. Akong ginapanghinaut nga bisan asa mo karon sa kalibutan, amping-amping lang ug pa-cute pod kung dunay time.
Niadtong niaging Sabado pa ko dinhi sa isla sa Bantayan, Cebu kay namugas lagi intawon, igsuon ko. Sa tabang ni Madam Rhona, nga nanghinobra ang kaguwapa, natawagan ning inyong higala moserbisyo sa mga "dili ingon nato," not like ours sa Ingles or in short (bisan mga tag-as kaayo sila) INGKANTO. Ngano? Taga England ug taga U.S.A. (dili ila Sir Bob Manliguez nga Upper Side of Agusan ha?) Amerika gyud!
Dili laag akong katuyoan dinhi kon dili mag-Monitor ug Evaluate o mosuta kung ang mga hinabang nga gihatag sa Shelter Box International nga organisasyon seguradong nadawat sa mga biktima sa Bagyong Yolanda nga mihapak sa dapit nila. In short, mahibal-an gyud kung duna bay mapahimuslanong mga tibaghak nga kaigsuonan nato nga naghinakog bisan daghang naglisud. Naah! Lahi baya ning gaba kay makapatulo gyud og singot, dala sip-on ug luha.
Sa wala gituyo'ng panghitabo nakaabot ko diri sa isla, nga Island Garden of Samal lang man ang akong gitinguhang adtoan niadtong milabay'ng mga semana. Si Lord gyud bah! Kung mopanalangin sa Iyang anak sobra-sobra. Hallelujah!
Bitaw, abi ko trabaho'ng daghan bisan dili ta ani hanas, mga inahan, adventure gamay ang kanako maghatag og kalipay apan lahi diay... Kung di ang mapaminawan ug maminaw sa tagsa-tagsa ka sugilanon sa mga biktima sa Bagyong Yolanda. Dili man seguro mo motuo apan daw gikumot-kumot sa dakong-balhibuong kamot ang gamay'ng dughan ko sa mga kaagi sa mga kaigsuonan nato. Nangaligwat ug nangadugmok ang mga b'yay (house) ug tanum, ug patay pod ang mga kahayopan nila.
Syud (sulod) sa kalamidad nga ilang naeksperyensyahan, hinay-hinay nga nagabangon karon ang mga taga-Isla sa Bantayan tungod sa daghang suporta ug grabeng paghigugma sa mga tawo nga bisan asa pa'ng gikan nga planeta - mingtunol gyud sa hinabang nila. Lain-laing kolor sa panit, hitsura ug sinultian apan usa lamang ang ilang katuyoan - to help the pipol of the Island. Pagkamaayo gyud sa Diyos Amahan nga mitandog sa mga katawhan aron modalit og hinabang.
Bisan hasta na nakong laguma tungod sa tumang kainit sa klima, kalipay nako nga nahatagan kita'g higayon nga moampo alang sa atong mga igsuon. Walay distansiya nga dili kayang abton sa Ginoo busa, sis, bro, i-apil na nato sila sa atong mga pag-ampo. Magkahiusa kita nga mahimong mopadayong maisugon ug malaumon ang mga biktima ni Yolanda ug mas monindot nga kinabuhi ug kaugmaon nila, igsuon. Amen ba? Sige, sugod na ta.