DAVAO DEL SUR -- Gipangulohan sa kagamhanang probinsiyal ang paglusad og "indignation rally" isip pagkondena sa gihimong pagpabusikad og landmine sa mga rebeldeng New People's Army (NPA) sa mga sibilyan alas 7:00 sa buntag kagahapon.
Human nag-martsa gikan sa Flying A, dalang Rizal Avenue, ning dakbayan sa Digos, gisundan dayon kini og Ecumenical Prayer for Peace ug hamubong programa pagsangko sa Rizal Park.
Gatusan ka mga tawo sa nagkadaiyang sektor ang misalmot apil ang mga tinun-an sa nagkadaiyang tunghaan, non-government organizations, ug uban pang ahensiya nga gitambungan usab sa mga sakop sa 39th Infantry Battalion sa Philippine Army.
Gikondena sa katawhan ang gihimo sa Communist Party of the Philippines (CPP)-New People's Army-National Democratic Front (NDF) ug nanawagan nga undangon na ang paggamit og mga landmine diin apil nga nasamdan ang lima ka mga rescue team volunteers sa Provincial Risk Reduction and Management Council (PDRRMC), gawas sa 12 ka mga sundalo.
Si Jun Dumayas, anak sa biktimang si Genaro Dumayas Sr., nanawagan sa mga NPA nga undangon ang brutal ug pa-traydor sa rebeldeng pundok.
Gikanayon niya nga way labot ang mga rescue team sa gubat sa NPA ug militar sanglit way gipili ang PDRRMC sa pagluwas og kinabuhi, ma-rebelde man o sundalo.
Kahinumdoman nga padung unta nga mokuha sa 12 ka mga samarong sundalo ang grupo sa PDRRMC dihang gitamnan og landmine sa mga komunista ang dalan didto sa Sitio Tower, Barangay Managa, Bansalan, Dominggo sa gabii.
Miani sab og dakong suporta ang peace rally gikan sa pribado ug publikong ahensiya ug komunidad human hugot nga gisaway ang gibuhat sa mga komunista.
Matud sa usa ka wa magpailang misalmot sa kalihukan, panahon na aron pakigbisogan ang mga rebelde pinaagi sa pagtaho gilayon ngadto sa military kon ugaling masiplatan sila sa ilang lugar.
Samtang si General Ariel Bernardo, 10th Infantry Division commander, mibisita sab sa mga naangol nga sibilyan.
Giasoy niya nga usa ka desperadong lakang ang gibuhat sa mga NPA human nga wa na kini giundangan paggukod.
Gisaad sa militar nga palibutan na nila ang tanang agianan ug dalan sa mga NPA aron hingpit na kining mawagtang sa probinsiya.
Sa pikas bahin, gihangop ni DavSur Governor Claude Bautista ang gipakitang panaghiusa sa nagkadaiyang grupo nga boluntaryong misalmot sa peace rally.
Gitinguha ni Bautista nga mahimong malinawon ang probinsiya ug Davao Occidental ug gihangyo ang mga NPA nga di idamay ang mga sibilyan sa pakiggubat sa gobyerno. (Orlando B. Dinoy)