MANAGLAHI ang reaksyon sa katawhan dihang girekomenda ni Senate Blue Ribbon Committee chair Sen. Teofisto Guingona III nga ipasaka ang kaso batok sa iyang mga kaubanang senador nga sila Juan Ponce Enrile, Jinggoy Estrada ug Ramon "Bong" Revilla labot sa giingon nga kalabutan nila sa multi-billion peso "pork" barrel scandal.
Ang kampo sa mga giakusahan nagsulti nga sistematiko kini nga pag-atake
sa administrasyong Aquino sa tulo ka mga senador, samtang ang kampo sab ni Guingona nagsulti nga mao kini ang epekto sa sala nga ilang nahimo.
Sa gipagawas nga Senate blue ribbon committee report, gisulti ni Guingona nga apil sa rekomendasyon ang pagpasaka sa kasong plunder sa tulo ug lahi sab nga imbestigasyon sa Senate ethics committee ug disbarment proceedings kang Enrile ug kanhi niini nga chief of staff nga si Atty. Jessica "Gigi" Reyes.
Kon atong mahinumdoman niadtong miaging tuig, una na nga napasaka sa Department of Justice (DOJ) sa Office of the Ombudsman ang kasong plunder batok sa tulo ka mga senador, lima ka kanhi kongresista ug negusyanteng si Janet Lim Napoles labot sa nabulgar nga P10-billion pork barrel scam.
Ang mga respondents na sila Enrile giingon nga dunay nakawkaw nga P172.8 million, Estrada (P183.79 million), Revilla (P224.5 million), kanhi congresswoman ug karon Masbate Gov. Rizalina Seachon-Lanete (P108.4 million), kanhi APEC party-list Rep. Edgar Valdez (P56.09 million) ug
ang giingon nga usa ka mastermind nga si Janet Lim-Napoles.
Gawas sa plunder, gipasaka sab ang kasong malversation of public funds kontra 35 pa ka ka tawo, lakip na ang chiefs of staff sa mga magbabalaod ug opisyal sa mga implementing agencies ilawom sa executive department.
Mas maayo kini nga ila nang gipasaka ang kaso sa husgado sanglit mao kini ang proper venue aron madepensahan sa mga giakusahan ang ilang kaugalingon nga dugay rang napakauwawan sa publiko pinaagi sa live coverage sa telebisyon.
Kon tinuod nga nangawkaw sila, angay silang manubag sa pagwaldas sa salapi sa ordinaryong Filipino.