Matud Nila: Kinsay nagsulti sa tinuod labot kagubot sa Talaingod?

MGA higala, adlaw nga Biyernes karon. Katapusang adlaw sa semana. Katapusang adlaw sab sa paghisgut nato sa mga isyu ning semanaha ang bida mao ang nahitabo didto sa Talaingod, Davao del Norte.

Nagsugod kini dihang mikanaog ang 1,300 ka mga lumad dinhi sa siyudad sa Davao tungod kay nahadlok nga maipit sa militarisasyon sa ilang lugar sa Barangay Dagohoy ug Barangay Palma Gil.

Kon ang mga lumad ang pasultihon, daghan ang mga sundalo nga nagkampo sa ilang lugar hinungdan nga di sila makapangibuhi nga malinawon.

Kadaghanan kanila nagsulti nga gipanghasi sila sa militar kinsa nagpasangil kanila nga mga sakop sa New People's Army.

Kon pangutan-on sab ang lokal nga gobyerno, moingon sab sila nga way militarisasyon sa ilang lugar. Hinuon, dunay mga NPA nga padayong nanghasi sa mga sibilyan.

Subay sa atong nasayran, ang lokal nga gobyerno nagdeklara niadtong Abril 1 nga ipailawom sa state of calamity ang maong lugar aron magamit ang P500-mil nga calamity fund alang sa mga mibakwit.

Nan, kon nagdeklara sila og state of calamity, nagpasabot kini nga dunay mga mibakwit, nganong moingon man ang local officials nga wala? Gawas pa niini, giingon nila nga gigamit lang sa mga militanteng grupo ang mga lumad.

Kinsa man kaha ang nagsulti sa tinuod? Mga higala, kamo na ang mohukom. Ania ang ilang pahayag:

Dunay militarisasyon

"Wala mi nagkinahanglan sa inyong relief goods. Ang among gusto lang ang papahawaon ang mga military sa among lugar. Dugay na ang yangungo namo sa mga pag-panglapas sa among katungod ug sa among kultura sa wa'y puas nga militarisasyon, apan wa mi paminawa. Daghan na mi og mga kaso nga giduol sa among mayor (Basilio Libayao) pero wala kini aksyon. Kahibalo siya nga ginabombahan ang among komunidad sa mga sundalo. Ginaharas ang among mga katribu, apan wala siyay aksyon: Nagpakabuta, bungol lang ang gobyerno sa Talaingod." ~ Datu Duloman Dawsay, spokesperson, Salugpongan, Talaingod, Davao del Norte

rWalay military operation

"Kay kung naa lang, ako mismo ang mo-protekta sa akong constituents. Bi daw hain ba gud nang ilang ginaingon nga helicopter nga naay bomba? Wala man. Mas napamatud-an man gani nga dunay rebel encampment sa maong lugar.

Positive nga naay NPA encampment sagad sa barrio sa Barangay Palma Gil. Karon gusto na ninyo papahawaon ang mga military? Naunsa ba? Ug alang sa inyong kasayuran, wala ko'y katakos mopahawa kanila kay di nako na sila hold kundi under sila sa national government. And we are appealing to the organizers... do not exploit the lumads. Kung unsa inyo problema ngadto sa military, sa gobyerno, wala man na silay labot. We are also capable to attend the needs of our constituents, dili ninyo sila kinahanglan dad-on pa sa siyudad sa Davao." ~ Hon. Basilio Libayao, Mayor, Talaingod, Davao del Norte

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph