MAGSUGOD na ang pag-obserbar sa Semana Santa nga naandan sa mga Katoliko karong adlawa ug tungod niini, gilusad sa Cagayan de Oro City Police Office (Cocpo) ang “Oplan Semana Santa.”
Gipasabot ni Police Chief Inspector Lemuel Gonda, kinsa hepe sa Operation and Plans Branch sa Cocpo, nga sa kasaulogan niini, alerto ang tibuok pwersa kapolisan dili lamang ang Cocpo apan tibouk rehiyon 10.
Ilang gipaniguro ang tanan mga lugar nga dagsaan og katawhan nga luwas ug adunay polis nga mobantay sa nagkadaiyang lugar.
Gawas sa mga area sa siyudad nga adunay mga kaugalingog Police Station aduna usab idugang nga mga polis aron makatabang sa pagpatuman sa kalinaw.
Matud ni Gonda nga sa siyudad sagad sa dagsaan sa katawhan mao ang Malasag Area ug Our Lady of Guadalupe sa Barangay Agusan hinungdan nga ila na nga gisiguro nga hapsay ug malinawon ang pagpanaad sa katawhan.
Gidili ang pagdala-dala og mga hait nga hinagiban, armas, ilimnong makahubog ug uban pa aron likay sa kagubot ug krimen.
Gipasalig usab sa Roads and Traffic Administration (RTA) nga dili magpunsisok ang mga sakyanan sa maong dapit ug gipaniguro nga walay sakyanan nga makasulod sa Malasag Area gawas lamang sa mga residente gyod sa maong dapit.
Hinuon gipasalig sa RTA nga adunay parking space sa ubos nga bahin ug adunay mga enforcer nga nakabantay niini. (SVB)