GAWAS sa pagtubag sa mga pangutana sa mga suki sa Super B sama sa suliran sa SSS, Philhealth, ug uban pang concerns, duna say higayon nga nakatabang ang mantalaan sa paghatag og kahigayonan nga makatungha ang pipila ka mga suki sa mantalaan nga gustong makahuman pagtungha.
Usa sa mga natabangan nga makatungha mao si Ambrosio Lacson Jr., gikan sa Sta. Maria, Agusan del Sur.
Ug dihang dinhi siya nagtrabaho sa siyudad sa Davao, nabatasan niya ang pagbasa og Superbalita.
Dihang nahimamat, nagsulti siya nga buot siyang makatungha bisan vocational course lang. Sanglit anaa kaniya ang interes sa pagtungha, gipahimuslan ning tigsuwat ang gitanyag sa Filipino Aviation Academy nga scholarship program.
Ang maong tunghaan, nga nahimutang sa Old Airport, Sasa, Davao City nagpatabang kaniadto sa Superbalita nga mahimong guest sa press conference sa Philippine Information Agency (PIA) 11.
Isip pasalamat, nagtanyag ang presidente nga modawat siya og working scholar nga irekomenda sa Superbalita.
Ug aron makatabang, girekomenda si Lacson sa maong sholarship program niadtong 2009 hangtud nga nakahuman sa kursong Avionics niadtong 2011.
"Nagpasalamat gyud ko sa tabang ninyo kay di ko makahuman kung wala tong scholarship program. Di unta ko makatrabaho karon sa airline company dinhi sa Pasay City," suma ni Lacson dihang gikumusta sa Superbalita.
Dugang niya nga di niya malimtan ang tabang sa mga tawo nga nahimong instrumento sa iyang kalampusan isip aircraft maintenance sa kaulohan.