MALINAWON ang paghulagway sa kapolisan sa kasaulogan sa Semana Santa hangtod sa adlaw sa pagkabanhaw kagahapon adlaw'ng Domingo.
Kini ang gibutygag ni Cagayan de Oro City Police Director Graciano Mijares ug miingon nga walay mga dagkong krimen nga natala sugod nga ilang gipatuman ang Oplan Semana Santa.
Kagahapon adlaw'ng Domingo sa pagkabanhaw hugot nga seguridad ang ilang gihatag sa mga manimbahay sa nagkadaiyang simbahan sa siyudad.
Ila usab gipaniguro nga adunay mga polis nga nakabantay sa nagkadaiyang beach resort sa dakbayan nga maoy sagad himoun ang selebrasyon sa mga relihiyong katoliko.
Samtang niadtong Huwebes Santo, diin gidagsaan sa mga nagpenetensya ang Malasag Garden sa Barangay Cugman ug Our Lady of Guadalupe sa Barangay Agusan ang moabot sa dul-an 30 mil ka deboto ang midagsa.
Dul-an sa 15 mil ang misaka sa Malasag samtang kapin 10 mil sa Our Lady of Guadalupe.
Hinoun, adunay pipila ka mga nakuhaan og mga hait nga hinagiban apan gibutyag sa mga opisyales sa barangay nga sa ilang pagsita niini ila man sab kini gipabilin tungod kay sagad man sa ilang tuyo sa maong dapit ang pagpenetensya.
Samtang sa report, mokabat sa 30 mil ka deboto ang miadto sa Devine Mercy Hills sa siyudad sa El Salvador Misamis Oriental samtang dul-an 30 mil usab ang mitungas sa Sipaka Point sa lungsod sa Talisayan Misamis Oriental.