DAGHANG mga taho nga nitumaw bahin sa panikas ginamit ang mga ATM cards, credit cards ug uban pang mga access device. Kon maghisgot kitag ATM, di ni mao kadtong automatic tubig machine, kon dili, ang automated teller machine. Pinaagi sa ATM card, ang usa ka depositor mahimong mo-withdraw o mokobra sa iyang deposito pinaagi sa ATM. Ang ATM card ug ang credit card gigamit karon sa daghang transkasyon, busa gisakyan sab sa mga criminal syndicates.
Daghan nga mga sindikato nga mo-access sa account number ug personal identification (PIN) sa mga ATM cards ug mga credit cards ug gamiton kini sa pagkobra sa kuwarta sa laing tawo o kaha pagpamalit og mga butang nga ilang ibaligya ginamit ang credit card sa laing tawo. Sa credit card, mahimo nga mo-cash advance, busa ang mga sindikato mahimo sab nga mokobrag kuwarta ginamit ang credit card.
Kining maong mga matang sa panikas gisilotan sa Republic Act 8484, ang “Access Devices Regulation Act of 1998.” Sumala ning maong balaod, ang access device “is any card, plate, code, account number, electronic serial number, personal identification number, or other telecommunications service, equipment, or instrumental identifier, or other means of account access that can be used to obtain money, good, services, or any other thing of value or to initiate a transfer of funds (other than a transfer originated solely by paper instrument).”
Ang sagad sa mga panikas gianamit ang mga access device mao ang paghimog peke nga access device, pangopya sa mga account number ug PIN number unya gamiton aron makakuhag kuwarta, mga butang, serbisyo ug uban pang mga butang nga dunay kantidad ug pagbalhin sa pundo gikan sa usa ka account ngadto sa laing account.
Unsa may angay nga buhaton niadtong mawad-an sa iyang credit card ug uban pang mga access device aron di siya manubag sa illegal nga paggamit niini?
Kinahanglan nga ipahibawo dayon ang pagkawagtang o pagkahanaw niini nga sa nag-isyu sa maong access device, lakip sa mga detalye ug sirkumstansiya sa pagkagtang niini. Niining paagiha, ang holder sa access device way tulubagon sa paggamit sa access device sa panikas.
Unsa man ang mga buhat nga gidili ning maong balaod nga pagpanikas ginamit ang access device? Naglakip kini sa paghimo, paggamit ug “trafficking sa peke o mini nga mga access device. Ang paggamit sa access device mao ang pagpanikas nga makakuhag kuwarta ug mga butang nga dunay kantidad. Matawag nga trafficking kon dunay daghan nga unauthorized access devices o kaha nag-apply og daghang access device.
Unsa man ang silot sa pagpanikas ginamit ang access device?
Sumala ning maong balaod, ang silot naglakip sa multa nga P10,000 o kaha duha ka pilo sa kantidad sa salapi o butang nga nakuha ginamit ang access device ingon man pagkabilanggo nga di moubos sa unom ka tuig hangtod sa 20 ka tuig. Kon attempted stage, ang silot katunga sa multa ug sa pagkabilanggo. Kon frustrated stage, two-thirds (2/3) sa multa ug sa pagkabilanggo.
(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)