NAKUHA sa Gilas Pilipinas ang number one spot sa Group E human nila malubong ang India, 99-65, sa niaging adlawa atol sa 2015 Fiba Asia Championships nga gipahigayon didto sa China.
Nakuha sa India ang una nga kwarter, 17-16, tungod sa hinay nga pagsugod sa Gilas ug sige panimpla sa ilang opensiba.
Hingpit lang gihapon nga away sulod sa siyam ka minutes apan nakakuha og bwelo ang Gilas sa segundos nabilin gikan tanan ni Ranidel de Ocampo tungod sa iyang tres 45 segundos nabilin ug dos sa 12 segundos aron moinat og unom ka puntos nga labaw paghuman sa halftime, 42-36.
Sugod pa lang kana, narakrakan pa sa Gilas ang India pagabri sa ikatulo nga kwarter human matunob nila ang pedal ug nilobo ang labaw sa 15 puntos, 65-50, sa maong kwarter.
Gisamotan pa sa Gilas og kulata ang India paingon sa dili maapsan nga labaw aron silyohon ang kadaogan.
Nangulo si Terence Romeo sa Gilas sa iyang 20 puntos ug upat ka assist, samtang nidugang ang naturalized Filipino center nga si Andray Blatche og 15 puntos.
Maatbang sa Gilas ang Lebanon karong adlawa sa quarterfinals.
Makita ang dula sa quarterfinals, live, sa TV 5.