GITUMAN ni kanhi IBF Junior welterweight champion Johnriel Casimero ang saad nga pildihon si Columbian boxer Mauricio Fuentes.
Kini luyo sa pagkatangtang kaniya sa korona tungod sa bug-at nga timbang.
Gipildi ni Casimero si Fuentes via knock-out ug gihuman lamang sud sa duha ka minuto ug 59 segundo ang bugno.
Kaduha ka beses sab nahagba sa ruyda si Fuentes sud lamang sa first round.
Unang natumba ang Columbian boxer dihang naigo sa solid right upper cut gikan sa Filipino boxer.
Human niini gisundan na sab sa solid right hook diin wa nakabawi si Fuentes.
Nakita nga agresibo ang lihuk sa Pinoy determinado kini nga pildihon ang kaatbang.
Nauna nang misaad si Casimero nga mobawi sa away, bisan nawad-an og titulo isip IBF welterweight champion.
Sa kasamtangan, buot ni Casimero nga maka-atubang si WBO flyweight champion Juan Francisco Estrada nga mipildi sa laing Pinoy boxer sama nila Brian Viloria ug Richie Mepranum.
Gihimo ang bugno nila Casimero ug Fuentes, Sabado sa gabii sa Waterfront Hotel, Cebu.