GITAMBAGAN sa Office of Provincial Agriculturist sa Kapitolyo ang mga mag-uuma nga magtanom og mga utanon nga makasugakod sa kainit sa panahon.
Si Provincial Agriculturist Roldan Saragena nirekomendar nga petchay, lettuce ug kangkong o short term crops ang mas maayo itanom sa panahon sa tinghuwaw.
Matod niya ang pagtanom og kamote maayo usab tungod kay makasugakod kini sa grabeng kainit sa panahon.
Si Saragena niawhag sa mga mag-uuma nga magpakisusi sa mga local agriculturist sa ilang dapit aron mahibaw-an unsay angay andamon o bantayan sa el niño.
Ang Philippine Atmospheric, Geophysical and Astronomical Services Administration nibanabana nga sa sunod buwan magsugod ang epekto sa el niño.
Si Saragena niingon mas maayo batasanon sa mga mag-uuma ang multiple cropping o pagtanom og duha ngadto sa tulo ka lagutmon o utanon aron dungan manubo ug mabaligya sa merkado.
“Getting more than one crop simultaneously is beneficial because one product will compensate if the other product sells less in the market,” dugang pagpasabot niini.
Ang Department of Agriculture 7 nitambag sa mga mag-uuma nga panalipdad ang kahayopan batok sa grabeng kainit sa panahon.
Atol sa post-Yolanda briefing nga gipasiugdahan sa Philippine Information Agency (PIA) 7 niadtong Huwebes, si Marina Hermoso, assistant regional director for operations sa DA 7, niingon angay himoan og pasilonganan ang kahayopan, hatagan og bitamina ug paimnon og tubig.
“Provide (them) good supplement. Palandungi kay pwerte kaayo inita,” dugang pa niya.
Samtang, ang OPA mopahigayon sa labing una nga Aqua-Marine Products Trade Fair sa lalawigan sa Sugbo karong Mayo 26-30.
Kini agi og pagsaulog sa buwan sa Mayo isip Month of the Ocean.
Ang kalihokan nga nagdala sa tema nga “Protect Mangroves, Mangroves Protect,” nagtinguha nga mahatagan og dapit ang mga mananagat pag-display sa ilang mga produkto ug pagpaligon sa ilang entrepreneurial skills.
Ang kalihokan himuon sa Capitol compound diin makita ang nagkadaiyang mga booth sa mga mananagat gikan sa kalungsoran ug mga dakbayan sa lalawigan sa Sugbo.
Karong Mayo 28, usa ka consultative meeting sa mga asosasyon sa mga mananagat ang ipahigayon. (SCG)