KIDAPAWAN CITY -- Misaka na sa siyam ka tawo ang napatay sa cholera outbreak sa Alamada, North Cotabato.
Gibutyag ni Alamada Municipal Administrator Ruben Cadava nga nadugang sa mga nakabsan sa kinabuhi si Uga Misig, 51, minyo nga molupyo sa Barangay Upper Dado.
Niadtong miaging semana pa namatikdan si Misig nga dunay sintomas sa cholera apan wala lamang niya kini tagda ug sa iyang pamilya.
Nakahimo pa ang biktima sa pagbisita sa iyang mga paryente sa Buldon, Maguindanao diin didto na siya nakabsan sa kinabuhi.
Gipamahayag ni Alamada Municipal Health Officer Dr. Rosario Bandala nga ilang gideklara nga cholera outbreak na ang sitwasiyon sa upat ka barangay sa munisipyo human migawas nga sa 769 nga na-ospital 438 niini positibo sa cholera sa diha nga sila gipailawom sa rectal swabbing examination.
Gidugang ni DOH-Soccsksargen Health and Education promotion officer Jenny Ventura nga kung mahutdan sa likido ang lawas sa tawo o na-dehydrate gumikan sa diarrhea nga usa ka timailhan sa cholera, kung dili dayon madala sa balay tambalanan, makabsan siya sa kinabuhi.
Gipalihok ni North Cotabato Governor Emmylou Lala Talino Mendoza ang mga health official sa probinsiya aron tutukan ang sitwasiyon sa mga biktima.
Sa pagkakaron, dili pa luwas ang tubig nga ilimnon sa mga barangay Upper Dado, Lower Dado, Pigcawaran ug mga kasikbit nga dapit gumikan sa cholera outbreak.
Temporaryo sab nga gisirad-an ang Asik-Asik Falls sa Sitio Dulao, Barangay Dado samtang dili pa ideklara nga cholera free na ang dapit. (Edgar Fuerzas)