KIDAPAWAN CITY -- Andam nga iyagyag ni Vice Mayor Samuel Alim ang tinuod nga hinungdan sa kamatayon sa 11 ka tawo samtang dul-an usa ka libo ang naospital sa giingong cholera outbreak niadtong Mayo 10.
Hugot nga gikanayon sa bise mayor nga duna siyay mga testigo nga mosulti sa ugat sa kamatayon ug pagkasakit sa mga tawo sa barangay sa Upper Dado, Lower Dado, Pigcawaran ug mga kasikbit nga dapit sa Alamada, North Cotabato.
Diretso nga gisulti ni Vice Mayor Alim sa pakighinabi sa Bombo Radyo ug Superbalita nga gihiloan ang mga tawo sa maong dapit bugti sa dako nga bahandi o bulawan (Yamashita treasure).
Nasayran nga unang nahitabo ang giingon nga cholera outbreak sa Alamada, dunay mga molupyo ang nakakita og gamay nga eroplano nga mora'g nangisprey og itom nga kolor sa kemikals kanila.
Human ang pipila ka gutlo, nakasinati na sila og sobrang kasakit sa ilang tiyan, pagsuka-kalibang ug nangalipong.
Sa pagsusi ni Alim sa hitabo bisan dili siya doktor, klaro kaayo niya nga gikan sa makahilo nga kemikal ang ugat sa hitabo.
Gani duna siyay mga gihuptan nga mga tawo nga motestigo nga sila nangalipong ug nahilo sa diha nga nalanghap nila ang hangin human nga miagi sa ilang dapit ang gamay nga eroplano.
Bag-o lang namahayag si Senador Nancy Binay nga paimbestigahan niya ang cholera outbreak sa Alamada kon unsa gyud ang tinuod nga ugat sa kamatayon ug pagka-ospital sa mga biktima.
Kahinumdoman nga gipagawas sa Department of Health (DOH)-Soccsksargen pinaagi kang Alamada Municipal Health Officer Dra. Rosario Bandala nga vibrio cholerae disease ang hinungdan sa maong hitabo basi sa resulta sa swab test.
Apan hangtud karon, wala pa gipagawas sa DOH ang physical ug chemical content gikan sa paghiling sa lawas sa mga biktima. (Edgar Fuerzas)