NORTH COTABATO -- Giklaro ni Alamada North Cotabato Vice Mayor Samuel Alim nga dili gikan kaniya ang pamahayag nga kemikals ang hinungdan sa giingon nga cholera outbreak niadtong Mayo 10.
Si Alim nagsulti nga ang mga doktor lamang ang dunay katungod nga mopagawas sa resulta sa cholera outbreak sa Alamada.
Matud ni Alim nga gihulat pa nila ang resulta sa imbestigasyon sa Department of Health sa Physical and Chemical Content sa mga biktima nga gihiling sa mga eksperto nga doktor aron maklaro ang tinuod nga ugat sa kamatayon ug pagka-ospital sa mga molupyo sa upat ka mga barangay sa maong lungsod.
Basi sa giluwatan ni Alamada Municipal Health Officer Dra. Rosario Bandala nga Vibrio Cholerae Disease ang hinungdan sa kamatayon ug pagka-ospital sa mga biktima mao nga nagdeklara sila og cholera outbreak.
Apan kadtong mga namuyo sa kabukiran sa Barangay Dado namahayag nga dili sila konbinsido nga nagagikan sa tubig sa balon ug spring nga ilang giinom ang posibleng mao hinungdan sa kamatayon ug pagka-ospital sa mga biktima.
Gumikan kay bisan kadtong wala makainom og tubig, gibati sab og kasakit sa ilang tiyan, pagsuka-kalibanga ug nangalipong.
Dunay mga sibilyan nga nagsulti nga nakakita sila og eroplano nga mibuga og itom nga daw kemikals apan dili pa maseguro ug makompirma gumikan angayan pa kining imbestigahan sa mga otoridad ug mga eksperto nga doktor.
Gikanayon ni Alim nga gisalig niya sa DOH, Municipal Health Office, ug Integrated Provincial Health Office sa probinsiya ang pagpagawas sa bisan unsa nga pamahayag kalabutan sa hitabo gumikan mga doktor lamang ang nakahibalo sa hinungdan sa kamatayon ug pagka-ospital sa mga biktima.
Nagpasalamat sab si Alim sa tanang mga sektor, mga doktor, mga tawo nga mitabang sa kalamidad, LGU sa Alamada ug ang kagamhanang probinsiyal.
Hinuon, sa kasamtangan, naningkamot pa si Alim, uban si Cotabato Governor Emmylou "Lala" Talino Mendoza, nga matabangan ang mga biktima. (Edgar Fuerzas)