BUG-AT nga gipas-an sa abaga sa mga ginikanan ning taliabot nga pagbukas sa klase.
Gikan sa kamahal sa matrikula anaa pa ang uniporme, gamit, plitihan ug bawon. Makawot ang dili katol. Samtang ang komunidad sa mga negosyante mobukas sa Cebu Business Month. Sa gobyerno nagpadayon ang kakulang sa lawak-saringan, lingkoranan ug mga magtutudlo.
Dunay mga gubaon kay gihilabtan sa linog ug bagyo. Sayang ang epiktibo nga Brigada Eskwela kay kulang man ang classrooms. Ang National Union of Students in the Phil. ug mga ginikanan supak nga buksan ang saring sa Agusto o Septiyembre.
* * *
Namatud-an sa drug test nga 14 na ka mga kawani sa Kapitolyo ang adik sa drugas. Unom sa City Hall. Sa barangay, lungsod ug siyudad namatud-an usab sa kinalit nga drug test. Tukmang silot ipahamtang o tagaan ba kahag higayon nga mag-usab. Sa awit bitaw naa may “One More Chance”. Asa naman diay ang kampanya batok drugas? Daghang napandol nga kaugmaon gumikan sa bisyo nga makaboang. Makatibhang sa utok ang shabu, cocaine, nubain ug marijuana. Ang walay ikapalit mantinil og hingos sa rugby. Ang namaligya sama ra nga nagnegosyo og kamatayon.
Apan dunay gipanday nga balaodnon nga maghimong legal sa marijuana kay giingong epiktibong tambal sa sakit. Hinoon ang Medical Marijuana Bill lantugian pa sa hawanan sa Kongreso. Tungod sa kauhaw sa kainit sa panahon walo ka mga kawani sa Kapitolyo nasakpang nag-inom. Bintaha kini kay sa drugas. Dunay bag-ong nakapaalarma nga drugas nga makapagana nga ang sagol ecstasy, shabu ug viagra nga gitawag og fly high.
* * *
Supreme Court ruling nagmantala nga bayran ang supplier ug kontraktor nga naghatod og serbisyo bisan ang kontrata nakalapas sa lagda sa auditing. Kahinomdoman ang korte mimando nga bayran ang dugang pagtrabaho sa Cebu City Sports Center (CCSC) ug Cebu International Convention Center (CICC) bisag wala malakip sa kontrata. WTG ang kontraktor sa CCSC ug CICC. Ubos kini sa prinsipyo nga “quantom meruit” nga kinahanglan bayran ang hinagoan.
Subo lang palandongon nga ang Kapitolyo nagmagahi sa pagbayad sa P607.239M ngadto sa 31 ka mga kontraktor nga naghago sa trabaho.
Samtang gipadayon ang Suroy-suroy kay usa ka investment, pagpalambo sa natad sa turismo, paglingi sa karaang kabilin, pagpalipang sa nagpahipi nga mga bahandi sa kinaiyahan, pagbuhi sa nagkahilis ug himalatyong kultura. Sama ra nga angayng ipadayon ang mga festivals sa mga lungsod ug siyudad sanglit makaani og bus-ok nga produkto sa kalamboan. Papason unta ang politikanhong kabangian ug ipadayon ang nasugdan.
(csa_1156@yahoo.com/0905-250-4643)