KORONADAL CITY -- Andam ang Office of Civil Defense (OCD) sa Soccsksargen sa posibleng pagbuto sa duha ka aktibo nga bulkan sa probinsiya sa South Cotabato.

Kini mao ang Mount Matutum sa Polomolok ug Mount Parker (Mt. Melibingoy) sa T'boli.

Gibutyag ni OCD-Soccsksargen Operation Officer Roy Durado nga niadtong tuig 2004 pa sila nangandam, dunay mga contingency plans na sila kon kini mobuto.

Aktibo ang lihok sa duha ka bulkan basi sa mga scientific evidences nga nakuha sa mga eksperto sa Philippine Institute of Volcanology and Seismology (Phivolcs).

Kahinumdoman nga namahayag si Phivolcs chief Renato Solidum nga kon mobuto ang Mount Parker ug Mount Matutum, susama sab sa Mount Pinatubo ang mahimong epekto niini sa katawhan ug kinaiyahan.

Apan giklaro ni Durado nga kon mobuto man ang duha ka bulkan, dili kini mahitabo karong tuiga.

Bisan pa man niini, nangandam ang OCD aron malikayan ang dakong epekto sa mga dapit palibot sa Mount Matutum ug Mount Parker ilabina sa mga molupyo.

Nahibaluan nga 300 na ka tuig nga wala mibuto ang duha ka aktibong bulkan sa South Cotabato nga maoy hinungdan sa kabalaka sa katawhan. (Edgar Fuerzas)