MOKABAT usa ka libo ka mga pulis ang ipakatag sa nagkadaiyang publiko ug pribadong tunghaan ning siyudad sa Davao karong adlawa atol sa unang adlaw sa pagbukas sa klase.
Kini ang gibutyag ni Davao City Police Office Director Vicente D. Danao Jr.
Suma ni Danao nga pahugtan nila ang seguridad sulod ug gawas sa mga tunghaan subay gipatuman nga "Oplan Balik Eskwela."
"There will be 1,000 police personnel to be deployed. This is in line with the directive of the Philippine National Police to reactivate the Oplan Balik Eskwela," sulti ni Danao.
Dugang sa opisyal nga anaa sila sa mga tunghaan aron masigurong luwas ang mga magtutudlo, estudyante ug inikanan nga maghatud sa ilang mga anak.
Gawas sa mga tunghaan, gipabilin sab ang hugot nga seguridad sa tanang entry ug exit points sa siyudad, mga mall ug sa mga dapit nga nagdasok ang katawhan.
Sa laing bahin, gipaneguro sab sa Traffic Management Center ug Traffic Management Group (TMC-TMG) nga mahan-ay dayon ang problema sa pagguot sa trapiko labi na sa Governor Generoso Bridge sa Bankerohan.
"Nagbuhat na ta og eksperimento, labi na ugma (karong adlawa) nga maoy pagbukas sa klase kay maghuot gyud ni, labi na sa Bankerohan Bridge. Ugma nato himuon ang atong naplanohan nga rota," sulti ni Police Superintendent Rodhelio Poliquit, hepe sa TMC-TMG, sa pakighinabi sa Superbalita kagahapon. (Jeepy P. Compio)