NAHAN-AY na sa kapulisan sa Central Visayas ang tanan nilang pagpangandam alang na sa pag-abli sa klase karong adlawa.

Si Supt. Renato Dugan, tigpamaba sa Police Regional Office (PRO) 7, nibutyag nga niadto pang miaging adlawa ang tanang pulis gipailawom na sa heightened alert.

Kini aron maseguro nga luwas ang mga tinun-an, mga ginikanan nga mohatod sa ilang anak ug mga magtutudlo nga mosud sa mga publikong tunghaan karong adlawa.

Matod ni Dugan nga aduna karon silay gipamutan nga mga police assistance center sa matag tunghaan aron maoy duolon sa mga ginikanan kon aduna silay suliran labot na sa pag-abli sa klase.

Nakig-alayon na usab sila sa mga barangay tanod sa matag lugar aron maoy moabag kanila sa paghapsay sa dagan sa trapiko.

Gani, ang sa Cebu City Police Office ang station 2 dunay daghang bantayanan ning pagbukas sa klase tungod sa daghang tunghaan nga nahimutang sa ilang area of responsibility.

Si Chief Insp. Wildemar Tiu, hepe sa station 2, nagkanayon nga ila nang gipangandaman ug gibahin ang iyang mga tawo atol sa unang adlaw sa pagbukas sa klase karong adlawa sanglit di siya makatugot nga dunay makalusot nga krimen atol sa naasoyng adlaw sanglit lakip sa ilang bantayan mao ang mga dagkong establisemento.

Matod ni Tiu ang iyang mga pulis ipakatap sa kadalanan ilabi na sa may Fuente Osmeña aron mabantayan ang mga banko ug mga dagkung tindahan gawas sa pagbutang ug mga personnel sa mga tunghaan sama sa Abellana National High School ug Cebu Central Elementary School nga giila nga usa sa labing dako nga tunghaan sa dakbayan sa Sugbo.

Karong adlawa ang kadagkoan sa kapulisan ug sa dakbayan sa Sugbo mosuroy sa mga tunghaan lakip sa ilang himuon mao ang paghatag og leaflets aron malikay ang mga tawo ug mga tinun-an sa mga kriminal ning panahon sa pagbalik na sa klase.