NASIKOP sa kapulisan kagahapong adlawa ang usa ka fish vendor kinsa suspek sa pagpusil-patay sa Mahayahay Uno, Barangay Pasil, siyudad sa Sugbo mga pasado alas 4:00 sa kaadlawon.
Naposasan sa kapulisan sa San Nicolas Police Station mga pasado alas 7:00 sa buntag kagahapon, si Christian Ian Marapoc, 23, lumolupyo sa dapit.
Patay si Crisanto Baguio, 29, usa ka traysikad drayber ug residente sa Missionary, Barangay Suba, siyudad sa Sugbo human kini gipusil patay ni Marapoc sa naasoyng dapit.
Matod ni PO1 Merlou Laborte sa Homicide Section sa Cebu City Police Office nga nahinabi sa Sun.Star Superbalita nga anaay usa ka impormante ang nibutyag kanila nga si Maropoc ang nagpusil kang Baguio.
Dugang niini nga pasado alas 4:00 sa kaadlawon kagahapon dihang adunay gipalit sa tindahan sa dapit si Baguio apan, mga singko metros gikan siya nipalit sa tindahan kalit lang kini gipusil ni Marapoc inubanan ang duha ka wa mailhing kauban niini.
Daling gidala si Baguio kuyog ang amahan niini nga si Virgilio Baguio, sa Cebu City Medical Center apan gideklarar na kini nga dead-on-arrival (DOA).
Nakaangkon og daghang samad pinusilan sa iyang liog nga bahin ang biktima hinungdan nga nahagba kini sa naasoy nga dapit ug gideklarar nga DOA.
Nakuha sa crime scene ang usa ka kabhang ug usa ka deformed slug sa kalibre 45 samtang anaa napriso sa San Nicolas Police Station si Marapoc.
Pipila ka oras human sa insidente dali sila nipahigayon og follow-up operation nga gipangulohan ni PO3 Joseph Victorioso sa Station 6 inubanan ang impormante ug nasikop ang suspek.