SUGOD karong adlawa, balik na ang klase sa tanang publikong eskwelahan sa tibuok nasod. Basi sa kasinatian ang karsada maoy labing apektado sa panahon sa ting­klase.

Dungan sa pagbalik sa klase modaghan sab ang mga sakyanan diha sa karsada kay modagsa man ang daghang pasahero. Pananglit sa mga sayo nga mag-atang og jeep sa mga eskina kauban na nimo nga moilog og sakay ang mga estudyante di ba?

Kaniadto sa nagpuyo pa ko sa St. Jude Acres sa Bulacao, problema kaayo ang sakay matag buntag ug sa oras sa tingpauli. Mao sab ni ang kasinatian sa halos tanang rota basta panahon sa tingklase.

SULBAD

Ang kalisod sa sakay sama sa naandan na nga suliran panahon sa tingklase. Ang kahuot sa karsada i­ngon sa wala nay kasulbaran kay nidaghan og maayo ang mga sakyanan ang mga karsada mao ra gihapon ka dak-a. Ang ubang barangay nipadagan ug mga sak­yanan paghakot sa mga tinun-an aron dili ma-late sa klase. Ug nakita nato nga epektibo kaayo ang maong paagi. Gawas nga dili ma-late makadaginot pa gyud ang mga ginikanan. Ang kuwarta nga ipliti ipabalon na lang. Sayod niini ang taga Lahug, Busay, Tisa, Capitol Site, Labangon ug ubang barangay nga nisimpatiya sa kahimtang sa mga tinun-an. Ang ubang barangay ambot nganong wala pa makahunahuna.

Kini nga obserbasyon akong gipaambit sa ubang Risk Reduction Management Officers ug nagkahiusa sila pag-ingon nga ang pagtunol og libreng masakyan sa mga tinun-an nagpalayo nila sa risgo diha sa karsada.

Usa sa niingon nga angayan gyud ni tutukan sa local government units mao si Talisay City Councilor Danny Caballero, chairman sa Committee on Police sa konseho sa Talisay, niingon siya nga ang libreng sakay magsilbi nga panagang sa mga bata batok sa tanang matang sa kriminalidad sa karsada.

Matod niya dili igo ang police visibility. Kinahanglan nga motampo sab ang mga opisyal sa barangay pagsiguro nga luwas kanunay kining mga tinun-an. Lain nga gilantaw ni Caballero mao kining mga tinun-an nga matanggong sa eskwelahan sa oras sa tingpamuhi kay naabtan ug kusog nga ulan. Mangapasmo na lang gud ning uban pagpinaabot kanus-a motuang ang ulan. Iyang gihangop ang sugyot nga unta dunay sakyanan sa barangay o city hall nga magamit niini nga katuyoan.

Ako mismo nakasaksi nga gilutoan sa taga Mabolo Elementary School og masimasima ang mga tinun-an nga na stranded taliwala sa kataas sa oras sa pagbunok sa ulan. Samtang nga naghisgot ta ini, dili nato kalimtan ang mga nagbaklay nga mga tinun-an sa bukid. Pahibaw-a ko kon wala mo gihakot.