ITUNOL ko daan ang pahalipay sa mga ginikanan nga migahin sa ilang kakugi ug gamayng bahandi aron makapatungha sa ilang mga anak. Karong adlawa ang laing pagbukas sa klase alang sa mga tinun-an sa elementarya ug sekondarya.

Sama sa naandang problema, pada­yong magdasok ang mga tinun-an sa mga pampublikong tunghaan. Si Dr. Carmelita Dulangon, ang regional director sa Department of Education (DepEd) 7, nipahibawo nga ilang napanglantawan nga mosaka karong tuiga ang kadaghanon sa mga tinun-an sa mga publikong tunghaan.

Apil sa nag-unang mga katarungan kay dunay mga ginikanan nga mipabalhin sa ilang anak ug tungha sa mga publikong tunghaan gikan sa mga pribadong tunghaan. Dili na madala ug utong sa mga ginikanan ang grabeng kamahal sa bayranan sa mga pribadong tunghaan.

Apan bisan sa mga publikong tunghaan, puwerte sang daghana ang mga bayranan ug amutan.

Subling gipasalig sa kadagkuan sa DepEd 7 nga wala silay kolektahon nga bayad alang sa enrollment sa atong kabataan.

Anaa gihapon ang problema sa sobrang pagdasok sa mga tinun-an sa classroom kon lawak saringan. Kini ang apil sa dakong hinungdan nga may sugyot sa kadagkuan sa DepEd nga himuon na lang nga tulo ka adlaw matag semana ang klase sa mga tinun-an sa elementarya ug sekondarya.

Ang mga tinun-an bahinon sa duha ka grupo. Ang unang grupo moklase gikan sa Lunes ngadto sa Miyerkules ug ang ikaduha klasehan gikan sa Huwebes ngadto sa Sabado.

Si Education Assistant Secretary Jesus Mateo nitug-an nga ang sakto nga ratio sa matag classroom mao ang 1:40 sa elementarya ug 1: 50 sa sekondarya. Buot ipasabot nga sa elementarya, ang pinakahaom sa matag classroom mao lang ang 40 ka mga tinun-an ug 50 lang sa sekondarya. Apan dunay mga tunghaan diin ang classroom tapukan sa mga 75 ka mga tinun-an.

Kon madayon ang mao nga plano sa DEPED, misamot ang kabalaka sa pipila ka mga ginikanan nga gamay na lang unya ug mahibaw-an ang mga bata. Kon dili mapun-an ang atong mga magtutudlo, mosakripisyo na sila ug mas taas nga oras sa pagtudlo.

Pero bisan pa man sa pag-angkon sa DEPED nga nagdasok na og maayo ang mga tinun-an, ilang giinsister nga wala sila nagkuwang ug classroom.

Kon wala pa nagkuwang ang classroom nganong ila mang gisugyot ang tulo ka adlaw nga klase sa matag semana?

Kon wala pa unta mapunta ang binilyon nga pork barrel sa korapsyon, pagkadaghan na untang mga tunghaan ug mga classroom ang mamugna. Dili na unta magsinardinas ang mga tinun-an sa alimuot nga mga classroom.