GIAPPROBAHAN na sa National Economic and De­velopment Authority (Neda) Board nga gipa­ngulohan ni Presidente Noynoy Aquino ang P10.6-bilyunes nga Bus Rapid Transit (BRT) system sa siyudad sa Sugbo.

Mao kini ang labing unang BRT system sa Pilipinas. Sa ato pa wa pa ni masuwayi. Mao kini ang hinungdan nga gisalindot ang maong proyekto sa Neda board kay matod ni PNoy, mahal ra kaayo ni nga eksperimento.

Apan unsaon nato pagkahibawo nga epektibo kini sa pagpaluag sa trapiko kon di nato suwayan? Kay naaprobahan na man, masuwayan na gyud.

***

Ang linya sa BRT system sa siyudad sa Sugbo magsukad sa Bulacao-Pardo subay sa Natalio Bacalso A­venue, liko ngadto sa Osmena Blvd., liko sa Escario St., lahos sa Gov. Mariano Cuenco Avenue hangtod ngadto sa Talamban.

Apan di kaha maligsan sa BRT ang mga public uti­lity jeepneys (PUJs) ingon man ang ilang mga drayber?

Ang Land Transportation Franchising and Regulatory Board (LTFRB) 7 nitala og kapin sa 2,600 ka jeepney drivers ug 1,310 ka PUJ units nga nagbiyahe sa 90 ka mga rota. Sumala pa sa usa ka taho, labing menos 22 ka mga rota sa PUJ ang maapektohan kon magsugod na ang BRT.

***

Si manlalaban Raffy Yap, ang executive director sa Cebu City Integrated Traffic Operations Management (Citom), niingon nga magpabilin ang mga PUJ, apan di na sila sa mga major routes nga maagian sa BRT.

Adto na sila ibutang sa feeder routes. Ang nagpabiling pangutana mao nga makauyon ba kaha ang mga sumasakay kay ang rota sa BRT straight man, di pareha sa rota sa PUJ nga daghan ang agian kay motuyok man.

Dunay nag-ingon nga segun ra ni sa anad. Tingali sa sinugdan mabaghoan, pero sa kadugayan, maanad na lang.

***

Ipatuman ang maong proyekto sa panahon ni Cebu City Mayor Mike Rama ug gipaabot nga operational na kini sa tuig 2017.

Ang BRT usa ka pet project ni kanhi mayor ug kanhi Cebu City south district congressman Tomas Osmeña nga hilabihang lipaya kay niturok na gyud ang liso nga iyang gitisok. Matod niya, “The seed I planted sprouted. You know what it feels to see a dream come true? This is it.”

Niturok na, pero kon di siya kabalik sa City Hall, lain maoy mopupo sa bunga.