DILI bastbasta ang gidaghanon sa mga tinun-an sa elementarya ug sekondarya nga mohugpa karon sa mga publikong tunghaan sa Central Visayas (CV) nga mokabat og 1.6 milyunes, sumala sa pagbanabana ni Dr. Carmelita Dulangon, regional director sa Department of Education (DepEd).
Maayong magsayo sa pagpamata aron dili maapiki sa oras sa pagsugod sa unang adlaw sa klase. Mao kini gitawag sa kinaraan nga magpalihi og sayo. Apan sumala sa binag-o nga panultion, “First impressions last.”
Mas maayong magbaton kita og positibong panglantaw uban sa mga ginikanan ug komunidad sa tunghaan nga lig-ong pundasyon sa maayong edukasyon tungod sa kapaspas unya sa pagtuhop sa mga pagtuon sa gaan ug walay libog nga panghunahuna.
Labing importante nga konsiderasyon ning unang adlaw sa klase mao ang seguridad labi na sa mga bata nga inosente nga malingaw sa ilang pagduwa sa mga bag-ong kailang bata.
Ang tagdumala sa mga tunghaan kinahanglan nga higpit sa ilang sistema sa sulod sa eskuwelahan samtang sa gawas, atong awhagon ang kagamhanan sa barangay nga moabag sa awtoridad sa pagpatunhay sa kahusay ug kalinaw nga dunay espisyal nga pagtutok sa mga batang tinun-an, lakip sa pagpahan-ay sa trapiko.
Usa sa dakong pasidaan gikan sa Deparment of Health (DOH) bahin sa mga pagkaon nga gipangbaligya daplin sa dalan duol sa mga tunghaan. Dason sa DOH, labing maayo nga pabawnan ang mga bata og pagkaon o snacks sa pagseguro nga limpiyo kini.
Malipayong paghangop labi na sa mga tinun-an ug mga magtutudlo ning unang adlaw sa klase.