BARANGAY tanod nga niiwag sa iyang bitbit nga flashlight ngadto sa duha ka kaduhang batan-on nga nagpahipi sa ngitngit ang gitabangan na hinuon og dunggab.

Samtang lab-asero napusilan sa iyang tuhod sa batan-ong mamumuno nga naghupohupo diha sa kasagbutan sa barangay Maribago.

Samaran sa iyang tiyan ug wala nga bukton si Nicholas Oyao, 54, minyo ug barangay tanod sa Pajac, dakbayan sa Lapu-Lapu.

Base sa pasiunang imbestigasyon sa Lapu-Lapu City Police Office nga niadtong ala 1:00 sa Domingo sa kadlawon naglakaw nga mipauli si Oyao sa sityo Sambag, Ompad compound sa maong dakbayan.

Nakamatikod ang maong tanod nga adunay duha ka lalake nga gibana-bana nga nagpangidaron og 20 ngadto sa 25 anyos ingon sa nagpahipi sa ngitngit.

Gisusi ni Oyao ginamit ang iyang flashlight ug iyang gi-iwagan ang mga dagway dungan sa pagpangutana, "hoy, nag-unsa mo diha?"

Igo nga gipawong sa tanod ang iyang flashlight wala siya makabantay nga giduol siya sa maong mga lalake dayon gibanosbanosan og dungab.

Nakahigayon pa si Oyao sa pagpangayo og tabang sa iyang mga kaubang tanod nga duty niadtong higayona sa barangay hall, human siya biya-i sa mga walay paungod nga suspek.

Nagduda ang kapulisan nga adunay dautang tuyo ang maong mga lalake nga nagpangitngit niadtong higayona apan nabalda sa dihang gi-iwagan og flashlight sa biktima.

Sa laing bahin, nagping-it sa kasakit ang fish vendor nga si Frankie Garciano, 44, nga taga-Sityo Pasil, Datag, Maribago sa Lapu-Lapu human mapusili ang iyang tuong tuhod sa nagbinugtong nga mamumuno.

Si Garciano diha ra sa iyang balay niadtong Sabado sa alas 11:30 sa gabii sa dihang iyang nalilian ang usa ka tawo nga nahupohupo sa labong nga kasagbutan.

Maisogon nga giduol sa biktima aron unta sa pagbadlong sa wala mailhing lalake ug sa iyang pagduol gibunlot na hinuon siya niini nga niresulta sa lamoklamok.

Wala kabantay si Garciano sa dihang igo nalang siyang nakadungog og buto sa armas dungan sa pagbiya sa maong lalake ug iyang nalang nabate ang pagpaminhod sa iyang tuo nga paa.

Kasamtangan nga nagpa-alim sa iyang samad pinusilan ang lab-asero sa Vicente Sotto Memorial Medical Center.

Atol niining pagsuwat, padayon pang giila ang identity sa mga mamumuno ug pagsikop kanila. (FVQ)