AMAHAN nga nitambong og birthday party sa silingan nga nangaligo sa baybayon sa Barangay Ibo, dakbayan sa Lapu-Lapu, nalumos human nasawom sa dagat nga hubog.
Samtang wala malahos ang dautang tuyo sa usa 31 anyos nga lalake sa dihang buot niyang hunoson ang iyang kinabuhi tungod sa sakit sa iyang tiyan.
Gideklarar nga patay nang nadangat sa Lapu-Lapu City Hospital ang biktima nga si Marciano Amado, 46, minyo nga taga-Sity Apro, barangay Ibo.
Saysay sa iyang anak nga si Emar, 19, nga nangaligo sila sa baybayon sa maong barangay kay ang ilang silingan nagsaulog sa adlawng natawhan.
Gihulagway nga naghudyaka ang nanambong sa maong okasyon nga niresulta sa tumang sa kahubog sa biktima, bisan nga nasarasay na sa paglakaw miadto kini sa dagat aron unta magpabugnaw.
Igo nga miabot sa lima ka tiil nga gilawmon sa dagat naglangoy-langoy si Amado apan wala magdugay namatikdan nalang nga naglutaw kini ingon sa wala nay kinabuhi.
Sa laing bahin, usa ka Marvin Cagas, 31, nga taga-Sityo Caimito, barangay Canjulao ang napakyas sa iyang tuyo nga maghikog human iyang gihansakan og hinagiban ang iyang tiyan.
Nasayran nga adunay higayon nga mag-hallucinate si Cagas tungod sa iyang gi-antos nga nervous breakdown, ilabi na nga bati-on kini og kalisang kay matod pa adunay tawo nga buot mopatay kaniya.
Nagpaalim sa iyang mga samad dinunggaban si Cagas sa Vicente Sotto Memorial Medical Center. (FVQ)