GITUDLO ni Department of Interior and Local Government Secretary Mar Roxas si Cebu Governor Hilario Davide III isip bag-ong chairperson sa Regional Peace and Order Council (RPOC) sa Central Visayas.

Si Davide ang nihulip ni Bohol Governor Edgar Chatto, kinsa gitudlo ni Presidente Benigno Aquino III isip bag-ong chairman sa gamhanang Regional Development Council (RDC) 7.

Si Roxas isip chairperson sa National Peace and Order Council maoy nitudlo ni Davide isip bag-ong RPOC chairperson.

Ang appointment sa gobernador sa lalawigan sa Sugbo aprobado ug pirmado ni Aquino ug epektibo ang pagpatuman niini human madawat ni Davide ang kamandoan niadtong Biyernes sa niaging semana.

Ang RPOC gilangkoban sa mga opisyal sa mga kagamhanan probinsya sa Sugbo, Bohol, Negros Oriental ug Siquijor uban sa Philippine National Police, Armed Forces of the Philippines, National Bureau of Investigation, Philippine Drug Enforcement Agency ug ubang ahensiya sa gobiyerno.

Si Davide, Chatto ug Roxas pulos mga kapartido ni Aquino sa Liberal Party.

Si Davide nipasabot nga wa dayon makatudlo ang presidente og hulip ni Chatto hinungdan nga karon lang siya natudlo sa maong puwesto.

Matod niya si Roxas ang personal nga nitunol sa iyang appointment niadtong Biyernes human siya giindurso sa gobernador sa probinsya sa Bohol.

Si Chatto nahimong chairperson sa RPOC gikan 2010 hangtod nahulipan ni Davide.

Nasayran, si Chatto maoy gitudlo ni Aquino isip chairperson sa RPOC hulip ni kanhi Gobernador ug karon Kong. Gwen Garcia, kinsa nangu sa maong konseho sud sa tulo ka sunodsunod nga termino sugod niadtong 2004.

Sa tigom sa RPOC niadtong Biyernes nga maoy kataposan ni Chatto isip chairperson, ang konseho nidiklarar sa Central Visayas isip conflict-manageable and development ready.

Isip bag-ong chairperson, mokonsulta si Davide sa mga miyembro sa RPOC sa mga programa ug kampanya nga panghingusgan aron magpabilin ang kahusay ug kalinaw sa rehiyon ug mas maminosan ang krimen. (SCG)