TUNGOD sa kainit sa adlaw, matag karon ug unya masinati ang kalit nga pagbundak sa uwan panahon sa hapon ug kagabhion, matod sa Philippine Atmospheric, Geophysical and Astronomical Services Administration (Pagasa).
Si Leonardo Samar, weather observer sa Pagasa Mactan, niklaro nga way weather disturbance nga naghinangat sa nasod base sa ilang monitoring.
Siya nagkanayon gumikan sa kainit sa adlaw adunay pagsaka sa init nga basa nga hangin gikan sa yuta ngadto sa taas nga bahin nga maoy mo-develop ug maporma nga dag-om nga gitawag og thunderstorm clouds.
Siya nipasabot sa buntag pa lang init na ang adlaw hinungdan nga makamugna kini sa pag-alsa sa warm moist air nga ibundak sa pag-abot sa hapon ug gabii.
Niadtong Miyerkules sa gabii, nibunok ang uwan sa pipila ka bahin sa Sugbo nga nakamugna og pagbaha sa pipila ka mga kalsada sama sa Barangay Kinasang-an, dan Colon ug kadtong lupa nga mga dapit.
Si Samar niingon nga niadtong Mayo 20 natala sa ilang Mactan, Lapu-Lapu Station ang labing init nga panahon sa Sugbo nga niabot og 34 degrees Celsius.
Matod niya samtang nagpadayon ang sistema nga ridge of high pressure posible mosaka pa ang temperatura sud niining buwana. (SCG)