DI MOMINOS 40 ka mga tunghaan sa elementarya napalgan sa mga opisyal sa dakbayan sa Sugbo nga way emergency exits atol sa unang adlaw sa klase kagahapon.

Si Acting Mayor Edgardo Labella uban ni Konsehal Dave Tumulak, chairman sa local disaster, nagkanayon nga kinahanglan nga mahatagan og solusyon ang depekto aron di mabutang sa peligro ang kinabuhi sa mga tinun-an.

Si Labella nakighinabi kang Atty. Joey Daluz, chairman sa local school board, aron mahatagan og alibyo ang maong problema uban sa pagpatawag ngadto sa mga contractor.

Matod niya nga dunay pito ngadto sa walo ka mga contractor nga andam sa paghimo gilayon og emergency exits sa mao nga mga tunghaan, labina niadtong upat ngadto sa lima ka mga andana.

Gipadayag ni Labella nga adunay pundo ang local school board diin iyang gibanabana nga mogasto og kapin o kulang P12 milyones ang paghimo og emergency exits sa mga eskwelahan.

Partikular sa gingan­lan sa acting mayor kansang mga elementary school way emergency exit mao ang barangay Zapatera, City Central, Mabolo ug uban pa.

“We have realized that with the 7.2 magnitude earthquake and the recent every now and then tremors, we have become a calamity prone community,” dugang niya.

Gihulagway ni Labella nga samot nga mameligro ang mga bata kon adunay sunog dapit sa hagdanan diin wa nay kadaganan ang mga tinun-an. (PAC)