HAPSAY, malampuson ug way dagkong mga problema, ang paghulagway sa mga opisyal sa Department of Education sa Central Visayas (DepEd 7) sa unang adlaw sa pagbukas sa klase sa mga publikong tunghaan kagahapon.

“Kaluoy sa Ginoo hapsay ang atong opening,” nagkanayon si DepEd 7 regional director Carmelita Dulangon sa pakighinabi sa Sun.Star Superbalita.

Siya niasoy nga sa pipila ka mga tunghaan, adunay pinangitaay sa mga estudyante sa ilang mga classroom ug magtutudlo pagka buntag, hinuon napahiluna ra usab sila.

Samtang si Sr. Supt. Orlando Ualat, acting director sa Police Regional Office (PRO) 7, niingon nga malinawon ang pagbukas sa klase bisan kon kuwang ang tagduha ka mga pulis nga ilang gipabantay sa matag tunghaan.

Ang mga pulis magbantay gikan sa alas 6-8 sa buntag ug mobalik sa alas 3 ngadto na sa alas 5 sa hapon.

Iya kining gituyo aron di usab masakripisyo ang pagpatrolya sa mga pulis sa kadalanan.

Si Cebu Provincial Schools Division Superintendent Arden Monisit niingon nga hapsay ang pag-abli sa klase ubos sa iyang division.

Apan nakadawat siya og text gikan ni Balamban Mayor Ace Stefan Binghay nga nipahibawo niya nga way magtutudlo ang ni-report sa Canangag Elementary School hinungdan nga iyang gipaadtuan sa usa sa mga education supervisor.

Nagpaabot siya og report bahin niini.

Aduna usay tulo ka mga ginikanan, matod ni Monisit, ang nireklamo nga wa gidawat ang ilang mga anak tungod sa kakuwang og mga credential human nibalhin gikan sa private school.

Na-enrol ra hinuon sila pagka hapon.

Ang paghugop sa mga late enrollee ug transferees ang nisugat sa mga pu­blikong tunghaan pagka bun­tag sa pagbukas sa klase.

Si Dulangon nihangyo sa mga ginikanan nga dili batasanon ang late nga pagpa-enrol sa mga anak tungod kay ang mga bata mismo bation og kauwaw kon late na mosud sa klase.

“Mauwaw man pud na ang ilang anak. Dili sayon ang bation sa mga bata kay wala na sila’y kalingkoran, wala na sila’y mga libro. Dili pud unta na nila pirmihon, sunod tuig dili na unta buhaton,” pagpasabot sa regional director.

Siya niangkon anaa gihapon ang problema sa kakuwang og classrooms, mga lingkuranan ug mga magtutudlo, apan aduna na silay giandam nga mga pamaagi pagsulbad niini.

Bisan sa naandan nga mga problema, matod ni Dulangon, nagsugod na ang pormal nga klase sa mga public school. (SCG/Dugang taho ni DRT)