PAGDILATAR. Nagkabuang na ang mga akusado sa pagpusil-patay kang Atty. Noel Achival ug sa duha niya ka alalay. Misumitir ang ilang abogado og lain nga motion aron malangay ang pagpasaka sa sumbong nga murder batok kanila.
Gipasakaan og sumbong nga murder sa National Bureau of Investigation (NBI) ang mga opisyales kaniadto sa HPG 7 nga sila si Insp. Joselito Lerion, Supt. Romualdo Iglesia, Chief Insp. Eduardo Mara, SPO4 Edwin Galan, ug PO1 Alex Bacani sa piskaliya sa pagpusil-patay kang Atty. Archival ug iyang kauban.
Laing abogado, Ryan Gabuya, misumitir og motion niadtong Biyernes nga di makapadayon og imbestigar ang panel sa probinsyal prosekyutor sa usa ka mabaw nga rason nga maimpluwensya unya ni Kon. Nestor Archival ang ilang resolusyon.
Way koneksiyon ang pagka-konsehal ni Archival sa dakbayan sa Sugbo, nga igsuon ni anhing Atty. Noel, tungod kay ang moimbestigar ang mga prosekyutor man sa probinsya sa Sugbo.
Gawas pa, gipareha usab sa ilang kaugalingon nga dili tarong ug way kredibilidad ang atong mga prosekyutor sa probinsya sa Sugbo kay hadlok sila nga maimpluwensya og pulitiko nga taga dakbayan sa Sugbo.
Ang paglangay-langay sa ilang kaso nakahatag na hinuon og dakong pagtuo sa katawhan nga sila maoy tinuoray nga nagpapatay ni Atty. Archival, nga naangin pa intawon ang iyang duha ka alalay.
Maingon tang pung nga katungod sa mga suspek ang pagdepensa sa ilang kaugalingon apan dunay kinutoban ang pamaagi. Ang paglangay-langay way dapit sa atong proseso sa piskaliya.
Misuwat usab ang mga suspetsado ngadto kang DOJ Sec. Leila Delima nga ibalhin ang imbestigasyon sa Manila sa mao lang gihapon nga rason nga dili katohuan o angayan sila nga mahadlok.
Atong masabot nga nahadlok ang mga sinumbong nga kon maipasaka ang kaso nga murder sa husgado wa unyay piyansa nga irekomenda sa piskaliya og makalabuso sila samtang magpadayon ang kaso.
****
NAMAKAK. Nagkayamukat na ang Cebu Puericulture Center and Maternity Hospital (CPCMH) sa ilang depensa human nila gipanghimakak nga wa nila gitipan ang baba sa bata nga bag-o ra gipanganak.
Karon, miangkon na sila nga ila diay butangan og pacifier ang bata nga dunay sakit unya gitipan aron di mahulog ug kini girekomnendar sa doctor. Nganong wa man mosulti dayon ang doctor kaniadto?
Lain pamakak na sad ning gibuhat sa opisyales sa hospital unya gigamit ang doctor nga kunohay maoy nagrekomendar aron mogawas nga way sala ang nurses nga nagbantay.
Unya asa man si doctor nganong wa nila pasultia kaniadto o karon aron motuo ta? Ang nakaparat sa opisyales sa Cebu maternity kay ila pa nga gipasumanginlan ang ginikanan sa bata nga maoy nagbutang sa tape sa baba.
Angayan nga pasakaan og sumbong sa ginikanan sa bata ang mga opisyales sa hospital aron mausab ang ilang pamatasan ug pamaagi ngadto sa mga bata nga bag-o ra nga gipanganak.
Apan kon wa pa mogawas ang hulagway ni Blaire Arsua, nga gipatik sa Facebook sa iyang mama, nga gitipan ang pacifier sa baba magpadayon gyud ang pagpamakak sa mga opisyales sa hospital.
Uwahi na ang pag-angkon sa taga hospital nga ila diay butangan og tape ang pacifier sa bata aron di mahagbong. Kaniadto pa unta nila gibuhat unya nangayo og pasaylo sa ginikanan.
Ilang gihagit ang ginikanan og kiha sa korte. Karon naa nay kiha. Unya igtubag nila sa kiha mamakak gihapon sila human nila angkona ang maong praktis nga di maayo alang sa mga bata nga bag-o ra gipanganak?
Human giangkon sa taga CPCMH ang pag-tape sa pacifier sa baba sa mga bata, angayan nga pahamtangan na sila sa Department of Health (DOH) sa wa pagsubay sa husto nga pamaagi.
(atty.ellieE@gmail.com)