DAVAO DEL SUR - Milutaw sa pagtuon sa mga progresibong pundok nga usa ka ordinaryong panday lamang sa ilang lugar ang gisikop nga gipailang lider sa rebeldeng New People's Army (NPA).

Nagsusi ang Bayan Muna ngadto sa mga opisyal sa barangay diin nagpuyo si Feliex Armodia didto sa dakbayan sa Koronadal, South Cotabato.

Matud ni Bayan Muna Representative Carlos Zarate, kinsa nangulo sa fact-finding mission didto sa Sitio Lasang, Barangay San Roque, usa ka Romeo Rivera Jr., ang gipaila sa militar nga si Kumander Felix Armodia, kinsa kanunay modangop sa mga opisyal sa barangay aron mangayo og trabaho.

Kahinumdoman, si Rivera gidakop didto sa iyang panimalay niadtong Mayo 2 sa kapulisan ug militar human gisilbi kaniya ang unom ka mga orden de aresto, sanglit gitudlo kini nga maoy utok sa pagpangatake sa Matanao Police Station.

Si Armodia giingong secretary general sa Committee Front 72 sa mga NPA nga naglihok sa bukirang parte sa Davao del Sur.

“All the residents and barangay officials we interviewed attested to the fact that Rivera Jr. has been a long time resident in the place; that he is an ordinary panday the barangay officials usually hired for their repair and other construction works,” asoy ni Zarate.

Gawas niini, nagahimo sab kini og mga organic fertilizers sama sa vermiculture ug nahimong aktibo sa iyang kampanya batok sa illegal nga pagmina ug kini usa ka convenor sa Panalipdan Tampakan.

“They cannot believe he is an NPA or that he is “Felix Armodia” the alleged NPA leader whose warrants of arrests are being used by the AFP to justify his detention,” pagklaro ni Zarate.

Nanaghap si Zarate nga usa ka kasong "mistaken identity” ang pagdakop kang Rivera.

“They charged him as ‘Felix Armodia’ so that he will be neutralized in his anti-mining activities,” ni Zarate, kinsa nagbahad nga iyang imbestigahan sa Kongreso ang maong kaso.

Gihimong ehemplo ni Zarate ang nahitabong pagsikop sab sa militar kang Rolly Panesa didto sa kauluhang Manila niadtong tuig 2013.

Si Panesa usa ka security guard apan gipaila kini nga opisyal sa NPA. Hinuon, ang Court of Appeals nagmando nga buhian si Panesa dihang nipasaka ang pamilya niini og writ of habeas corpus.

Apan, luyo sa mando sa korte wa mahiuli ang ganti nga gipaguwa sa kasundaluhan alang sa ilang military asset.

Una nang gibarugan ni Lt. Col. Norman Marcos Flores Jr., commanding officer sa 1002nd Brigade, wa sila masayop sa pagsikop kang Armodia sanglit taas nga lugway ang ilang gihimo una kini hingpit nga naaresto.

Sa kasamtangan, gikustodiya sa Bureau of Jail Management and Penology si Armodia diin gipahugtan niini ang seguridad, inabagan sa militar ug kapulisan human gikonsiderang risgo kanila ang dinakpan. (Orlando Dinoy)