TULO ang patay sa pinusilay sa J. Alcantara Street o mas nailhan nga Private, Barangay Sambag 1, siyudad sa Sugbo sayo sa buntag sa Lunes, Enero 21, tali sa kanhi suod nga managhigalang pamilya.
Giingong niaslom ang relasyon tungod sa uyab.
Unang namatay diha-diha dayon mao si Vanzant Navales, 30, taga St. Jude, Barangay Bulacao, tinun-an sa abogasiya nga naa na sa ikatulong tuig sa usa ka unibersidad sa syudad sa Sugbo.
Siya maoy gitumbok nga nanulong sa panimalay sa mga biktima nga silang Edwin Bacaltos, 58, ug anak niini nga si Shaun 23.
Nahitabo ang pinusilay pasado alas 6 kagahapon sa buntag sa dihang nangabot ang grupo ni Navales sa tugkaran sa balay sa mga Bacaltos.
Gidala pa pagdali sa tambalanan ang amahan ug anak apan pipila ka oras ang milabay nakabsan sa kinabuhi.
Matod ni Chief Inspector Eduardo Sanchez, hepe sa Station 2 sa Cebu City Police Office (CCPO), nga base sa ilang nakuha nga footage sa close circuit television (CCTV), nangabot ang grupo ni Navales, kauban ang igsuon niining si Vincent ug tulo ka mga lalake.
Nigawas sa balay sila si Edwin ug Shaun aron atubangon ang grupo sa mga Navales.
Si Sanchez nitumbok kang Edwin nga armado og KG9 submachine pistol.
Sa ilang panagkomprontase, gipusil ni Edwin si Vanzant, kinsa nakita sa footage nga natumba.
Dinhi, nanglanit og mga armas ang mga kuyog ni Vanzant ug nahitabo ang pinusilay tali nila ug kang Edwin.
Naigo sila si Edwin ug Shaun, kinsa daling gidala sa tambalanan, apan nangamatay tungod sa mga samad pinusilan.
Si Vanzant namatay diha-diha sa mga samad.
Matod ni Sanchez nga base sa footage, nipunit og armas si Michael Bacaltos, kinsa maoy gipangita ni Vanzant.
Giingong gitiwasan og pusil ni Michael si Vanzant nga nagligdas na sa karsada.
LAING BERSYON
Giangkon ni Michael nga siya ang nakapusil patay kang Vanzant Navales sa dihang iyang nailog ang dala niini nga Glock 9mm.
Iyang gibutyag nga padung na unta sila mangatulog ni Shaun apan nangabot ang grupo ni Vanzant ug nanghasi.
Iya kining gigawas ug nahitabo dayon ang panaglalis.
Apan kalit nga nigawas ang iyang amahan nga nagdala og KG9 nga maoy hinungdan nga giunhan sa pagpusil ni Vanzant.
“Sige nig panawag nako hasta iyang igsuon sigeg panawag nako. Wala jud ko modaginot. Karon buntag mopiyong na mi sa akong manghod, nisaba lag kalit diri, naa diay sila,” saysay ni Michael sa sibyaanang dyHP.
Si Victoriana Nacua, 80, ugangan ni Edwin, nitug-an sa dyHP nga pasado alas 5 sa buntag padung na unta sila manimba sa Sto. Niño apan adunay kalit lang nga naglalis sa gawas.
Pipila ka gutlo ang milabay, buto-buto na sa armas ang iyang nabati.
BABAYE?
Gipasabot ni Michael nga suod sila nga managhigala ni Vanzant tungod kay susama sila og hilig sa sakyanan.
Apan mikalit lang og niaslom ang ilang relasyon sa dihang gidudahan siya nga nakigrelasyon sa kanhi uyab niini nga taga Bacolod.
Tungod niadto, nibuwag na siya sa grupo ug nagtukod og negosyo nga buy and sell sa sakyanan uban sa iyang manghod.
Apan napukaw na usab ang ilang away sa milabayng tuig tungod gihapon sa babaye.
“Dugay na ning gubot namo kay iyang ex didto sa Bacolod ba, nagdala kog sakyanan sa Bacolod kay nahalin. Pagbalik nako, iya na kong gidudahan sa iyang ex nga maoy akung gikoan. Walay hinungdan, ila kong gikontrahan bisan naa na siyay uyab ha iya kung giaway tungod sa iyang ex. Mao to nahawa ko sa grupo sukad ato,”dugang ni Michael.
Apan usa ka tinubdan nga di gustong nganlan, nisulti sa Superbalita Cebu nga negusyo ang mas dakong hinungdan sa away.
Ang kabahin sa babaye gamay ra kini.
Kagahapon sa hapon, si Vincent nitahan sa kapulisan.
Mahimong mapasakaan nila og kasong homicide o murder si Michael sanglit giangkon man niini nga siya ang nakapusil patay kang Vanzant.
“Si Michael maapil siya kay siya man ang nagpatay ni Vanzant. Murder or homicide. Tan-awon nato ang circumstances,” pasabot ni Sanchez.